सातारा : पुणे-बेंगलोर महामार्गावर जोशीविहीर (ता. वाई) येथे झालेल्या भीषण अपघातात मंदार कोल्हटकर (वय 45 रा. कोल्हटकर आळी, सातारा) व धिरज पाटील (वय 38 रा. ढवळी, ता. वाळवा, जि. सांगली) हे जागीच ठार झाले. हे दोघे तरुण भारत संवाद मध्ये वितरण विभागात कार्यरत होते.

मंदार कोल्हटकर व धिरज पाटील हे आपल्या दुचाकीवरुन रस्त्याच्या डावीकडून सातार्‍याच्या दिशेने येत होते. त्याचवेळी पुण्याहून कोल्हापूरकडे निघालेल्या विजय शहा (रा. मंगळवार पेठ, कोल्हापूर) यांच्या क्विड गाडीने त्यांना जोरदार धडक दिली. ही धडक इतकी जोरदार होती की दोघेही उडून अतिशय दूर फेकले गेले. महामार्गाच्या बाजूला असलेल्या सीसीटीव्हीमध्ये ही घटना कैद झाली असून क्विड कारही महामार्गावरील मधली लेन सोडून डाव्या लेनमध्ये येत हा अपघात झाल्याचे स्पष्ट दिसत आहे. यावरुनच क्विड कार चालक अनियंत्रित असल्याचे प्रत्यक्षदर्शीनी सांगितले.

अपघाताची माहिती मिळताच सातारा जिल्हा रुग्णालय परिसरात तरुण भारत परिवारातील सदस्य, सातार्‍याच्या नाट्यक्षेत्रातील अनेक कलाकार यांनी गर्दी केली होती. सातार्‍याच्या नाट्य क्षेत्रात मंदार कोल्हटकर यांचे योगदान होते. त्याने काही चित्रपट, मालिका, नाटके तसेच जाहिरातींसाठी अभिनय केला होता.

मंदार कोल्हटकर यांच्या पश्चात आई वैजंती, पत्नी मयुरा, दोन मुले मितेश आणि मिहीर असा परिवार आहे.

धिरज पाटील यांच्या पश्चात वडील बाळासो, आई उषाताई असा परिवार आहे.

मंदार कोल्हटकर यांचा अंत्यविधी शुक्रवार दि. 19 रोजी संगममाहुली येथे करण्यात येणार असल्याचे सांगण्यात आले, तर धिरज पाटील यांचा अंत्यविधीचा कार्यक्रम ढवळी, ता. वाळवा, जि. सांगली याठिकाणी होणार आहे.

या दोघांच्या अपघाती मृत्यूने तरुण भारत परिवार, सातार्‍यातील नाट्यकर्मी व वृत्तपत्र कर्मचार्‍यांमध्ये शोककळा पसरली आहे.