पुणे : यजमान महाराष्ट्राने रंगतदार लढतीत गतविजेत्या मध्य प्रदेशचा २-१ असा पराभव करून चौदाव्या हॉकी इंडिया वरिष्ठ महिला राष्ट्रीय हॉकी स्पर्धेची अंतिम फेरी गाठली. तेथे त्यांची गाठ हरियाना संघाबरोबर पडणार आहे. 

नेहरूनगर येथील मेजर ध्यानचंद हॉकी मैदानावर शुक्रवारी झालेल्या उपांत्य फेरीत सामन्याची अखेरची आठ मिनिटे बाकी असताना महाराष्ट्र पिछाडीवर होता. मात्र, सहा मिनिटांमध्ये दोन गोल करताना त्यांनी विजय मिळवला. 

खेळाच्या ५२व्या मिनिटाला पेनल्टी कॉर्नरवर आकांक्षासिंगने गोल करून महाराष्ट्राला १-१ अशी बरोबरी साधून दिली, तर ५५ व्या मिनिटाला काजल आटपाडकरने केलेला मैदानी गोल निर्णायक ठरला. त्याआधी २८ व्या मिनिटाला हृतिकासिंगने गोल करीत मध्य प्रदेशला १-० असे आघाडीवर नेले. मात्र, त्यांना ही आघाडी राखता आली नाही.