सातारा : शेकडो वर्षांची परंपरा असलेल्या व पश्चिम महाराष्ट्रातील हजारो भाविकांचे श्रद्धास्थान असलेल्या सातारा तालुक्यातील श्री क्षेत्र निनाम येथील मानाच्या सासनकाठीचे शुक्रवारी (दि. १९) वाडी रत्नागिरीकडे प्रस्थान होणार आहे. या प्रस्थानासोबतच निनाम येथील दहा दिवसांच्या यात्रेला सुरुवात होत आहे.

वाडी रत्नागिरी येथील श्री जोतिर्लिंग देवस्थान हे लाखो भाविकांचे श्रद्धास्थान आहे. वाडी रत्नागिरी चैत्र यात्रा दि. २३ एप्रिल रोजी होत आहे. त्या यात्रेत सहभागी होण्याकरिता अनेक मानाच्या सासनकाठ्या जात असतात. श्री क्षेत्र निनाम येथील सासनकाठीला या यात्रेत महत्वाचे स्थान असून गावकरी वर्षानुवर्षे पायी चालत ही मानाची सासनकाठी घेऊन वाडी रत्नागिरी येथे जात असतात. 

१९ एप्रिल रोजी प्रस्थान झाल्यावर सासनकाठी सोनापूर, सासपडे, पाली, वडगाव, इंदोली, हिंगनोळे, कराड, कासेगाव, माणिकवाडी, केखले (गणेशबाग) मार्गे दि. २१ एप्रिल रोजी वाडी रत्नागिरी येथे पोहोचेल. दि. २३ आणि २४ एप्रिल रोजी यात्रा पार पाडून २५ एप्रिल रोजी सासनकाठीचा श्री क्षेत्र निनामकडे परतीचा प्रवास सुरु होईल आणि २७ एप्रिल रोजी सासनकाठीचे श्री क्षेत्र निनाम येथे सायंकाळी ५ वाजता आगमन होईल अशी माहिती श्री ज्योतिर्लिंग देवस्थान यात्रा कमिटीतर्फे देण्यात आली.