सातारा : पाटण तालुक्यातील करपेवाडीत १६ वर्षांच्या मुलीची हत्या झाल्याची घटना तीन वर्षांपूर्वी घडली होती. या घटनेत सातारा पोलिसांनी दोन मांत्रिक आणि त्या दुर्दैवी मुलीच्या आजीला तीन वर्षानंतर अटक केली असून या खूनाचा उलगडा झाला आहे. चौकशीमध्ये गुप्तधनासाठी आजीनेच आपल्या नातीचा हा नरबळी दिल्याचं पोलिसांकडून सांगण्यात आलं आहे.
२२ जानेवारी २०१९ रोजी करपेवाडी येथे ही हत्या झाली होती.  भाग्यश्री माने हीचा मृतदेह त्या दिवशी दुपारी गावालगतच्या शिवारात गळा चिरलेल्या स्थितीत आढळून आला होता. त्या दिवशी सकाळी ती कॉलेजला जाते, असे सांगून घरातून निघून गेल्याचे कुटुंबीयांनी पोलिसांनी सांगितले होते. या प्रकरणातील आरोपींना पकडण्यास पोलिसांना यश आलं असून अजून काही आरोपींना शोधण्यासाठी पथके रवाना करण्यात आली आहेत. या प्रकरणात सुरवातीला पोलिसांचा संशय मुलीच्या आई-वडीलांवर होता. मात्र, तपास सुरु असताना काही संशयीत पुरावे मिळाल्यानंतर ही हत्या आजीने गुप्तधनाच्या हव्यासापोटी करण्यात आल्याचं पोलिसांनी सांगितलं आहे.