सातारा : अजिंक्यतारा किल्ल्यावरुन पडलेल्या व्यक्तीची सुखरुप सुटका करुन त्याला अधिक उपचारांसाठी दवाखान्यात दाखल करण्यात दया शितोळे यांच्या ‘कमांडो’ना यश आले आहे. त्यांच्या या सामाजिक कार्याबद्दल उपस्थितांनी या अकॅडमीचे कौतुक करीत शितोळे यांचे आभार मानले आहेत.
याबाबत मिळालेली माहिती अशी, आज दि. 24 रोजी अजिंक्यतारा किल्ल्यावरुन एकजण पडला असल्याबाबतचा फोन सातारा तालुका पोलीस ठाण्यातून जकातवाडी, ता. सातारा येथील ‘कमांडो’ करिअर अकॅडमीचे दया शितोळे यांना आला. त्यावेळी दया शितोळे यांनी वेळ न दवडता आपल्या ‘कमांडोज’ना बरोबर घेत थेट अजिंक्यतारा किल्ला गाठला. त्याचवेळी संबंधित व्यक्तीचा शोध शिवेंद्रसिंहराजे रेस्न्यू टीमही घेत होती. मात्र, शितोळे यांच्या कमांडोजनी त्या अपघातग्रस्त व्यक्तीचा शोध घेत त्याला काही अवधीतच शोधून काढले. यानंतर संबंधितास सुखरुपपणे तेथून बाहेर काढण्यात येवून ऍम्ब्युलन्सने जिल्हा शासकीय रुग्णालयात अधिक उपचारासाठी पाठविण्यात आले. दया शितोळे यांनी वेळ न दवडता केलेल्या या कार्याबद्दल उपस्थितांनी या अकॅडमीचे कौतुक करीत शितोळे यांचे आभार मानले आहेत.