अ‍ॅडलेड : भारतीय गोलंदाजांनी केलेल्या भेदक मार्‍यामुळे पहिल्या कसोटी सामन्यात विजयाच्या आशा पल्लवीत झालेला भारतीय संघ आत लाजिरवाण्या पराभवाच्या छायेत आला आहे.  पहिल्या डावात ऑस्ट्रेलियाला 191 धावांत गुंडाळून 53 धावांची आघाडी घेणार्‍या भारतीय संघाची दुसर्‍या डावात ऑस्ट्रेलियन मार्‍यासमोर भंबेरी उडाली. पॅट कमिन्स, जोश हेजलवूड या दुकलीने भारतीय संघाला खिंडार पाडत संघाची अवस्था दयनीय केली. 
भारताचा दुसरा डाव 9 बाद 36 वर संपुष्टात आला. यामुळे ऑस्ट्रेलियाला विजयासाठी 90 धावांचं सोपं आव्हान मिळालं आहे. या निमित्ताने कसोटी क्रिकेटच्या इतिहासात भारतीय संघाने आपल्या निच्चांकी धावसंख्येची नोंद केली आहे. 1974 साली इंग्लंडविरुद्ध लॉर्ड्स कसोटी सामन्यात भारताने 42 धावा केल्या होत्या. त्यानंतर 46 वर्षांनी भारतावर ही नामुष्की ओढावली आहे.
दुसर्‍या दिवसाच्या अखेरीस भारतीय संघाने 1 बाद 9 अशी मजल मारली. नाईट वॉचमन जसप्रीत बुमराहला कमिन्सने झटपट माघारी धाडलं. यानंतर भारतीय संघाला लागलेली गळती थांबलीच नाही. मयांक अग्रवाल, अजिंक्य रहाणे, विराट कोहली, वृद्धीमान साहा, रविचंद्रन आश्विन यासारखे फलंदाज माघारी परतत राहिले. ज्यामुळे टीम इंडिया संकटात सापडली.
हनुमा विहारी आणि उमेश यादव यांनी अखेरीस झुंज देण्याचा प्रयत्न केला. परंतू त्यांचे प्रयत्न तोकडेच पडले. अखेरीस भारताचा दुसरा डाव 9 बाद 36 धावांवर संपवण्यात ऑस्ट्रेलियाला यश मिळालं. टीम इंडियाचा एकही फलंदाज दोन आकडी धावसंख्या गाठू शकला नाही. कांगारुंकडून जोश हेजलवूडने 5 तर पॅट कमिन्सने 4 बळी घेतले.