अ‍ॅडलेड: ऑस्ट्रेलिया विरूध्द सुरू असलेल्या पहिल्या कसोटी सामन्यात भारतीय गोलंदाजींनी केलेल्या भेदक मार्‍यापुढे कांगारूंनी नांगी टाकली. भारताने केलेल्या 244 धावांचा पाठलाग करताना ऑस्ट्रेलियाचा पहिला डाव 191 धावांवर आटोपला. भारताकडून पहिल्या डावात रविचंद्रन आश्विनने 4, उमेश यादवने 3 जसप्रीत बुमराहने 2 बळी घेतले. कर्णधार टीम पेनचं अर्धशतक आणि मार्नस लाबुशेनची एकाकी झुंज या जोरावर ऑस्ट्रेलियाने स्वतःवरची नामुष्की टाळली. 
ऑस्ट्रेलियाच्या डावाची सुरुवातही खराब झाली. मॅथ्यू वेड आणि जो बर्न्स या सलामीवीरांना बुमराहने पायचीत करत भारताला चांगली सुरुवात करुन दिली. मार्नस लाबुशेनने एका बाजू लावून धरत भारतीय गोलंदाजांचा नेटाने सामना केला. ऑस्ट्रेलियाला बॅकफूटवर ढकलण्याची भारताकडे चांगली संधी होती. परंतू भारतीय क्षेत्ररक्षकांनी लाबुशेनला तीन जीवदानं देत अत्यंत खराब कामगिरी केली. अखेरीस कर्णधार विराट कोहलीने रविचंद्रन आश्विनच्या हाती चेंडू दिला.
आश्विननेही कर्णधाराचा विश्वास सार्थ ठरवत ऑस्ट्रेलियाच्या डावाला खिंडार पाडलं. स्टिव्ह स्मिथ, ट्रॅविस हेड आणि कॅमरुन ग्रीन यांना एकामागोमाग एक माघारी धाडत आश्विनने कांगारुंचा निम्मा संघ माघारी धाडला. लाबुशेनला माघारी धाडण्यासाठी भारतीय गोलंदाजांनी अथक प्रयत्न केले. परंतू त्यांच्या प्रयत्नांना यश आलं नाही. अखेरीस कर्णधार पेन आणि लाबुशेन यांनी कांगारुंचा डाव सावरत दुसर्‍या सत्राअखेरीस 5 बाद 92 अशी मजल मारुन दिली.
चहापानाच्या सत्रानंतर उमेश यादवने एकाच षटकात लाबुशेन आणि कमिन्सला माघारी धाडत ऑस्ट्रेलियाला बॅकफूटवर ढकललं. दुसर्‍या बाजूने कर्णधार टीम पेनने एक बाजू लावून धरत आपलं अर्धशतक झळकावलं. स्टार्कनेही त्याला उत्तम साथ दिली. अखेरीस स्टार्क आणि लॉयन या तळातल्या फलंदाजांना बाद करण्यात भारतीय गोलंदाजांना यश आलं.