नवी दिल्ली: अ‍ॅडलेड वरील मानहानीकारक पराभवाची दुसर्‍या कसोटी सव्याज परतफेड करणार्‍या भारतीय संघाची डोकेदुखी वाढण्याची शक्यता आहे. मेलबर्न येथील पराभव कांगारूंच्या चांगला जिव्हारी लागला आहे. तिसर्‍या कसोटी सामन्यासाठी ऑस्ट्रेलियाच्या संघात धडाकेबाज फलंदाजाची एन्ट्री होणार असल्याची शक्यता वर्तवली जात आहे. 
गोलंदाजांचा कर्दनकाळ अशी बिरूदवली मिरवणार्‍या डेव्हिड वॉर्नचा संघात समावेश केला जाऊ शकतो. अशी बातमी आता पुढे येत आहे. डेव्हिड वॉर्नरच्या सोबतीला अजून दोन खेळाडूंचा ऑस्ट्रेलियाच्या संघात समावेश झाल्याचेही वृत्त आहे. त्यामध्ये विल पुकोवस्की आणि वेगवान गोलंदाज सीन अ‍ॅबॉटचेही यावेळी ऑस्ट्रेलियाच्या संभाव्य संघात पुनरागमन होणार असल्याचे दिसत आहे. ऑस्ट्रेलियाने तिसर्‍या कसोटी सामन्यासाठी आपल्या संघात महत्वाचे बदल केले आहेत. त्यामुळे हे बदल आता संघाच्या किती पथ्यावर पडतात, याची उत्सुकता चाहत्यांना नक्कीच असेल. पण ऑस्ट्रेलियाच्या संघाची अधिकृत घोषणा अजून होणे बाकी आहे.
दुसर्‍या बाजूला भारताचा वेगवान गोलंदाज उमेश यादव हा दुसर्‍या सामन्यात दुखापतग्रस्त झाला आहे. त्यामुळे तो तिसर्‍या सामन्यात खेळणार की नाही, याबाबत साशंकता आहे. त्याचबरोबर मोहम्मद शमीही दुखापतीमुळे या दौर्‍यात खेळू शकणार नाही. त्यामुळे तिसर्‍या सामन्यात जर उमेश खेळू शकणार नसेल, तर त्याच्या जागी मराठमोळा शार्दुल ठाकूर किंवा नवदीप सैनी या दोन युवा वेगवान गोलंदाजांना संधी मिळू शकते. त्यामुळे तिसर्‍या सामन्यात नेमके कोणते बदल होतात, याची उत्सुकता सर्वांनाच असेल.