मुंबई: फिटनेस चाचणी पास केल्यामुळे रोहित शर्मा शनिवार दि.12डिसेंबर रोजी ऑस्ट्रेलियासाठी रवाना होण्याची शक्यता वर्तविण्यात आली आहे. एएनआयनं याबाबतचं वृत्त दिलं आहे. अनुभवी सलामीवीर रोहित शर्मांच्या अनुपस्थितीमुळे लागलेली भारतीय संघाची चिंता मिटली आहे. 
बंगळुरु येथे एनसीएमध्ये झालेली फिटनेस चाचणी रोहित शर्मानं पास केली आहे. शनिवारी, 12 तारखेला रोहित शर्मा ऑस्ट्रेलियासाठी रवाना होईल अशी शक्यता आहे. ऑस्ट्रेलियात रोहित 14 दिवसांच्या विलगीकरणात राहील. ऑक्टोबर महिन्यात ‘आयपीएल’दरम्यान मांडीचे स्नायू ताणले गेल्यामुळे रोहितला काही साखळी सामन्यांना मुकावे लागले. त्यामुळेच रोहितची ऑस्ट्रेलियाविरुद्ध एकदिवसीय आणि ट्वेन्टी-20 मालिकेसाठी भारतीय संघात निवड करण्यात आली नाही. आता जवळपास एक महिना तंदुरुस्तीवर लक्ष दिल्यावर ‘एनसीए’चे प्रमुख राहुल द्रविड, फिजिओ आणि निवड समिती सदस्यांच्या मार्गदर्शनाखाली रोहितची चाचणी झाली. ही फिटनेस चाचणी रोहित शर्मा पास झाला आहे.
14 दिवसांच्या विलगीकरणामुळे रोहित शर्मा पहिल्या दोन कसोटी सामन्याला मुकणार आहे. तिसर्‍या कसोटी सामन्यापासून रोहित शर्मा उपलब्ध असणार आहे. 17 डिसेंबरपासून भारत आणि ऑस्ट्रेलिया यांच्यामध्ये चार कसोटी सामन्याच्या मालिकेला सुरुवात होणार आहे. पहिल्या कसोटी सामन्यानंतर विराट कोहली मायदेशी परतणार आहे. त्यामुळे विराट कोहलीच्या अनुपस्थितीत रोहित शर्मावर आणि पुजारावर भारतीय संघाच्या फलंदाजी मदार असेल.  विराट कोहलीच्या अनुपस्थितीत अजिंक्य रहाणे संघाचं नेतृत्व करणार आहे.