महाबळेश्‍वर : नाकिंदा, ता. महाबळेश्‍वर येथील ब्राईट लँड या हॉटेलच्या मालकाला अवैध उत्खनन केल्याप्रकरणी महाबळेश्‍वर तहसिलदार यांनी सुमारे पाच लाखांचा दंड ठोठावला असून उत्खनन तसेच बेकायदेशीर बांधकाम केलेल्या कामावर हातोडा टाकण्याचे आदेशही तहसिलदारांनी दिलेले आहेत.

याबाबत माहिती अशी की, नाकिंदा, ता. महाबळेश्‍वर येथे विजय सेवकरमाणी यांचे ब्राईट लँड नावाचे हॉटेल आहे. गेल्या अनेक वर्षांपासून हे हॉटेल सेवारमाणी चालवित आहेत. परंतू गेल्या काही महिन्यांपासून सेवकरमाणी यांनी नाकिंदा येथील सर्व्हे नं. 3/4 क्षेत्र 34 आर मध्ये हॉटेलच्या उतारास संरक्षक भिंत तसेच हॉटेलमधील एसटीपी सांडपाणी तसेच कचरा साठविण्यासाठी याठिकाणी मोठे उत्खनन केले आहे. याचप्रमाणे याच जागेवर बेकायदेशीर बांधकामही केले आहे. याबाबत महाबळेश्‍वर तहसिलदार यांच्याकडे तक्रार करण्यात आली होती. त्यानुसार तहसिलदारांनी बेकायदेशीर उत्खनन तसेच बांधकामाबाबत पंचनामा करण्याचे आदेश मंडलाधिकार्‍यांना दिले होते. त्याप्रमाणे मंडलाधिकार्‍यांनी बेकायदेशीर बांधकाम व उत्खननाचा पंचनामा केला असता याठिकाणी 126.21 ब्रास बांधकाम केल्याचे निदर्शनास आले. पंचनामा केल्यानंतर महाबळेश्‍वर तहसिलदार यांनी सुमारे सहा महिन्यानंतर ब्राईट लँड हॉटेलला याप्रकरणी पाच लाखांचा दंड ठोठावला आहे. मात्र ही संपूर्ण कारवाई संशयाच्या भोवर्‍यात आली असून ब्राईट लँड हॉटेलचे मालक विजय सेवकरमाणी यांनी केलेल्या अनाधिकृत बांधकामावर महाबळेश्‍वर तहसिलदार हातोडा टाकणार काय, याकडेही महाबळेश्‍वरकरांचे लक्ष लागले आहे.