दहिवडी :  मार्डी ता. माण येथे शुक्रवारी (दि. 10) लाचलुपत प्रतिबंधक विभागाने सापळा रचून दहिवडीचे पोलीस उपनिरीक्षक दबडे यांच्यावर कारवाई केली. मात्र याप्रकरणात लाचेची मागणी करण्यामध्ये सहाय्यक निरीक्षक प्रविण पाटील यांचाही सहभाग असून त्यांची चौकशी करून कायदेशीर कारवाई करावी अशी मागणी लाचलुचपत प्रकरणातील तक्रारदाराने पोलीस अधिक्षक पंकज देशमुख यांच्याकडे निवेदनाद्वारे केली आहे. 

निवेदनात म्हटले आहे की, मार्डी येथील एका हॉटेल व परमीट रुमच्या शेजारी दहिवडी पोलिसांनी 4 ऑगस्ट रोजी सकाळी 8 वाजता छापा टाकला. या छापा कारवाईत काहीही कारण नसताना हॉटेल व परमीट रुम चालकाला गोवण्यात आल्याचा आरोप आहे. तसेच संबंधीतावर दबाव टाकून लायसन्स रद्द करण्याचा रिपोर्ट जिल्हाधिकार्‍यांना पाठवतो, अशी धमकी देण्यात आली. तसेच रिपोर्ट न पाठविण्यासाठी दहिवडीचे सहाय्यक पोलीस निरीक्षक प्रविण पाटील यांनी लाचेची मागणी केल्याचा आरोप तक्रारदाराने केला आहे. परमीट रुम चालकाने लाचलुचपत प्रतिबंधक विभागाकडे रितसर तक्रार केली. त्यानंतर लाचलुचतपच्या अधिकार्‍यांनी सापळा रचून उपनिरीक्षक दबडे यांच्यावर कारवाई केली. मात्र याप्रकरणात उपनिरीक्षक दबडे यांच्यासह सहाय्यक निरीक्षक प्रविण पाटील यांचाही सहभाग असल्याचा आरोप तक्रारदाराने निवेदनात केला आहे. याबाबतची खात्री करण्यासाठी 4 ऑगस्ट ते 10 ऑगस्टपर्यंतचे दहिवडी पोलीस ठाण्यातील सीसीटिव्ही फुटेज आणि लाच लुचपत विभागाकडे असणारे रेकॉर्डींग तपासण्यात यावे. व्हाईस रेकॉर्डींगमध्ये सहाय्यक निरीक्षक प्रविण पाटील याचा सहभाग असल्याचे उपनिरीक्षक दबडे याच्या बोलण्यावरून दिसून येते, असेही निवेदनात म्हटले आहे.