मेढा : भैरवनाथ युवा क्रीडा मंडळाचे जेष्ठ सल्लागार, महात्मा गांधी वाचनालयाचे सर्वेसर्वा, आदर्श शिक्षक मेढा गावचे सुपुत्र शामराव क्षीरसागर गुरुजी यांचे आज अल्पशा आजाराने निधन झाले. 
एक अभ्यासू तत्त्वचिंतक, उत्तम वक्ता, चोखंदळ वाचक, प्रभावी सूत्रसंचालक, उमदा नाट्यकलाकार, उत्कृष्ट संघटक, वाचन संस्कृतीचा चालक अशा कितीतरी भूमिका लीलया सांभाळणारे शिक्षण क्षेत्रातील ऋषीतुल्य व्यक्तीमत्व आज काळाच्या पडद्याआड गेले आहे, अशा शब्दांत अनेक मान्यवरांनी शोक व्यक्त केला आहे.  
शिक्षकीपेशा बरोबरच अनेक सामाजिक व सार्वजनिक क्षेत्रात त्यांचा मोलाचा सहभाग होता. महात्मा गांधी वाचनालयामध्ये ग्रंथपाल ते अध्यक्ष असे गेले 51 वर्ष ग्रंथालय चळवळीत काम केले. वाचनालयाच्या भरभराटीमध्ये त्यांचा सिंहाचा वाटा आहे. जिल्हा ग्रंथालयाचे संचालक म्हणूनही त्यांनी अनेक वर्ष काम केले. जावली तालुका ग्रंथालय संघाचे स्थापने मध्येही त्यांचा पुढाकार होता. आदर्श जिल्हा शिक्षक पुरस्कार, आदर्श जिल्हा ग्रंथालयीन कार्यकर्ता पुरस्कार, महात्मा गांधी वाचनालयाचा जीवनगौरव पुरस्कार असे अनेक सन्मान त्यांच्या कार्याची पोहोच पावती देतात. काही वर्षापूर्वीच केंद्र प्रमुख म्हणून पवित्र अशा शिक्षण क्षेत्रातून सेवानिवृत्त झाले होते. त्यांच्या पश्चात पत्नी, दोन मुले व एक मुलगी असा परिवार आहे.