पुसेगाव : मंगळवारी (दि. 16) संध्याकाळी साडेसहाच्या दरम्यान पाऊलवाटेने शेतातून घरी परतणाऱ्या दरजाई ता. खटाव येथील एका व्यक्तीचा अज्ञात व्यक्तीने खून केला असून संपत गुलाब सत्रे (वय 55) राहणार दरजाई, ता. खटाव असे या मृत व्यक्तीचे नाव आहे.
या घटनेची नोंद पुसेगाव पोलिस ठाण्यात झाली आहे. याबाबत पोलिसांनी सांगितले, आपल्या शेतात गेलेले संपत गुलाब सत्रे हे मंगळवारी (दि. 16) संध्याकाळी साडेसहाच्या दरम्यान पाऊल वाटेने घरी परत येत असताना अज्ञात व्यक्तीने त्यांच्या डोक्यात व डाव्या कानावर हत्याराने मारुन त्यांना गंभीर जखमी केले. या घटनेमुळे संपत सत्रे यांचा मृत्यू झाला असल्याची फिर्याद मयत संपत संत्रे यांची पत्नी निलम संपत सत्रे यांनी दिली असून पुसेगाव पोलिस ठाण्याचे सहायक पोलिस निरीक्षक विश्वजीत घोडके हे तपास करत आहेत. 
या घटनेनंतर कोरेगाव येथील डीवायएसपी गणेश किद्रे, सातारा येथील गुन्हे अन्वेषणचे पोलिस निरीक्षक किशोर धुमाळ, सातारा येथील श्वान पथक व पुसेगाव पोलिसांनी घटनास्थळाची पाहणी करुन तपास सुरु केला आहे. पोलिस अधिक्षक अजयकुमार बन्सल व अप्पर पोलिस, अधिक्षक धिरज पाटील यांच्या मार्गदर्शनाखाली विविध तपास ठिकाणी तपास पथके पाठविण्यात आली आहेत.