कराड : इंडियन बँक, कराड शाखेतील मॅनेजरने आगाशिवनगर-मलकापूर (ता. कराड) येथील राहत्या फ्लॅटमध्ये गळफास घेऊन आत्महत्या केल्याची घटना शुक्रवारी उघडकीस आली. या घटनेप्रकरणी पोलिसांकडून बँकेतील महिला उपक्षेत्रीय अधिकारी आणि क्षेत्रीय अधिकारी या दोघींवर गुन्हा दाखल करण्यात आला आहे.
उपक्षेत्रीय अधिकारी मैथेली शरण सावला व क्षेत्रीय अधिकारी अर्चना सहदेव अशी गुन्हा दाखल झालेल्या महिलांची नावे आहेत. याबाबत पोलिसांकडून मिळालेली माहिती व फिर्यादीने दिलेल्या माहितीनुसार, रविकिरण केशव लाडे (मूळ रा. मुरुड, ता. जि. लातूर) यांनी आत्महत्या करण्यापूर्वी लिहिलेल्या चिठ्ठीत उपक्षेत्रीय अधिकारी मैथेली शरण सावला व क्षेत्रीय अधिकारी अर्चना सहदेव यांची नावे आहेत. त्यांच्या त्रासाला कंटाळून रविकिरण यांनी आत्महत्या केल्याचे चिठ्ठीत व फिर्यादीत म्हटले आहे.
याप्रकरणी मृत रविकिरण यांचे बंधू अक्षय केशव लाडे (वय ३२) यांनी कराड शहर पोलिस ठाण्यात फिर्याद दिली आहे. याबाबत पोलिसांकडून अधिक तपास सुरू आहे. संबंधित दोन्ही अधिका-यांनी रविकिरण यांना नेमका काय त्रास दिला होता, याचा तपास सुरू असल्याचे पोलिसांनी सांगितले. तपासकामी लाडे यांचा मोबाइल आणि बँकेतील काही कागदपत्रे ताब्यात घेतली आहे. त्रास दिल्याचा आरोप असलेल्या दोन्ही महिला अधिका-यांचा शोध सुरू असल्याची माहिती पोलिसांनी दिली.