सातारा : दुष्काळाच्या झळांनी होरपळणाऱ्या माण तालुक्यातील शेतकऱ्यांच्या व्यथा जाणून घेत पालकमंत्री शंभूराज देसाई यांनी दिवाळीच्या पहिल्याच दिवशी पिंपरी येथे शेतकऱ्यांसोबत दिवाळी साजरी केली. कोणताही औपचारिक सोहळा न करता थेट शेताच्या बांधावर शेतकऱ्यांसोबत बसून त्यांनी फराळाचा आस्वाद घेतला. यावेळी शेतकऱ्यांशी संवाद साधत त्यांच्या अडीअडचणी जाणून घेतल्या. तसेच दिवाळीपूर्वी शेतकऱ्यांच्या खात्यावर जमा झालेली पाच हजार रुपयांची रक्कम ही अंतिम नुकसानभरपाई नसून केवळ अग्रीम मदत असल्याचे स्पष्ट केले.
पालकमंत्री देसाई यांच्यासमवेत शिवसेनेचे जिल्हा संपर्कप्रमुख शेखर गोरे उपस्थित होते. दुष्काळी परिस्थितीमुळे यंदा शेतकऱ्यांच्या दिवाळीवर चिंतेचे सावट आहे. पिकांचे नुकसान, जनावरांच्या चाऱ्याचा प्रश्न आणि आर्थिक अडचणी अशा संकटांचा सामना करणाऱ्या शेतकऱ्यांना दिलासा देण्यासाठी देसाई यांनी पिंपरी गावाला भेट दिली. यावेळी त्यांनी शेतकऱ्यांच्या बांधावरच बसून त्यांच्याशी मनमोकळा संवाद साधला.
शिवसेनेच्या वतीने गावातील नागरिकांना दिवाळी साहित्य किटचे वाटप करण्यात आले. शासनाकडून दिवाळीपूर्वी शेतकऱ्यांच्या खात्यावर जमा करण्यात आलेली पाच हजार रुपयांची मदत म्हणजे संपूर्ण नुकसानभरपाई असल्याचा गैरसमज करून घेऊ नये. ही रक्कम केवळ दिवाळी सण साजरा करता यावा, यासाठी दिलेली अग्रीम मदत आहे. प्रत्यक्ष पंचनाम्यांनुसार शेतकऱ्यांना संपूर्ण नुकसानभरपाई देण्याबाबत शासन सकारात्मक असल्याचे देसाई यांनी स्पष्ट केले.
दरम्यान, दुष्काळी भागातील जनावरांच्या चाऱ्याचा प्रश्न गंभीर बनत आहे. शेतकऱ्यांच्या मागणीनुसार चारा छावण्या सुरू करण्याबाबतही शासन स्तरावर विचार सुरू असून, यासंदर्भातील निर्णय लवकरच मंत्रिमंडळाच्या बैठकीत घेतला जाईल, असे आश्वासन त्यांनी दिले.
दुष्काळाच्या संकटात शेतकऱ्यांच्या बांधावर जाऊन त्यांच्यासोबत दिवाळी साजरी करण्याच्या पालकमंत्र्यांच्या या उपक्रमातून शेतकऱ्यांशी थेट संवाद साधण्याचा प्रयत्न झाला. मात्र, आता शेतकऱ्यांना दिलासा देणाऱ्या आश्वासनांची प्रत्यक्ष अंमलबजावणी कधी होते, याकडे जिल्ह्यातील शेतकऱ्यांचे लक्ष लागले आहे.