सातारा : सातारा जिल्हा मध्यवर्ती सहकारी बँकेच्या पंचवार्षिक निवडणुकीच्या पार्श्वभूमीवर शेंद्रे येथील अजिंक्यतारा सहकारी साखर कारखाना परिसरात महायुतीने ठरावधारकांचा मेळावा घेत शक्तिप्रदर्शन केले. सहकार क्षेत्रावरील वर्चस्व कायम राखण्याबरोबरच जिल्ह्याच्या राजकारणातील आपली ताकद अधोरेखित करण्याचा प्रयत्न या मेळाव्यातून करण्यात आला. बँकेची सत्ता, सहकारातील नेतृत्व आणि आगामी राजकीय समीकरणे या पार्श्वभूमीवर या मेळाव्याला विशेष महत्त्व प्राप्त झाले आहे.
स्व. श्रीमंत छत्रपती अभयसिंहराजे भोसले सांस्कृतिक भवन, शाहूनगर, शेंद्रे येथे झालेल्या या मेळाव्याला विधान परिषदेचे माजी सभापती रामराजे नाईक निंबाळकर, मंत्री जयकुमार गोरे, मंत्री मकरंद आबा पाटील, आमदार धैर्यशील कदम यांच्यासह विविध पदाधिकारी, कार्यकर्ते आणि ठरावधारक मोठ्या संख्येने उपस्थित होते. साताऱ्याचे नगराध्यक्ष अमोल मोहिते, जिल्हा परिषद उपाध्यक्ष राजू भोसले यांच्यासह स्थानिक स्वराज्य संस्थांमधील पदाधिकाऱ्यांची उपस्थितीही लक्षवेधी ठरली.
जिल्हा बँकेची निवडणूक केवळ संचालक निवडीपुरती मर्यादित नसून जिल्ह्यातील सहकार क्षेत्रावर कोणाचे वर्चस्व राहणार, याची कसोटी मानली जात आहे. विविध राजकीय गटांचे हितसंबंध, सहकारी संस्थांमधील प्रभाव आणि बँकेच्या नेतृत्वाभोवती आकाराला येणारी समीकरणे यामुळे निवडणुकीतील चुरस वाढली आहे. अशा परिस्थितीत महायुतीच्या नेत्यांनी एकाच व्यासपीठावर येत ठरावधारकांशी संवाद साधला.बँकेच्या हितासाठी आणि प्रगतीसाठी महायुतीच्या उमेदवारांना विजयी करण्याचे आवाहन करण्यात आले.
सहकाराच्या मुद्द्यावर मतदारांना साद
बँकेची प्रगती, सहकार चळवळीचे बळकटीकरण, पारदर्शक कारभार आणि विकासाचा मुद्दा पुढे करून महायुतीने मतदारांपर्यंत पोहोचण्याचा प्रयत्न केला. मात्र, प्रत्यक्ष मतदानात नेत्यांच्या एकजुटीचे रूपांतर मतांमध्ये कितपत होते, यावरच या शक्तिप्रदर्शनाचे राजकीय यश ठरणार आहे. रविवार, दि. १ नोव्हेंबर रोजी सकाळी आठ ते सायंकाळी पाच या वेळेत मतदान होणार आहे. त्यामुळे ठरावधारकांची मनधरणी, संस्थास्तरावरील संपर्क आणि मतदानाचे नियोजन यांना अंतिम टप्प्यात वेग येणार आहे. जिल्हा बँकेच्या सत्तासमीकरणात कोण बाजी मारणार, याकडे आता संपूर्ण जिल्ह्याचे लक्ष लागले आहे.