सातारा : धोम धरणाच्या पाण्यासाठी पेटलेल्या शेतकरी आंदोलनाला अखेर यश आले आहे. 'पाणी सुटल्याशिवाय आंदोलन मागे घेणार नाही,' असा ठाम निर्धार केलेल्या शेतकऱ्यांच्या एकजुटीपुढे प्रशासनाला नमते घ्यावे लागले. जलसंपदा मंत्र्यांनी धोम कालव्यातून पाणी सोडण्याचे आदेश दिल्यानंतर अखेर पाण्याचे आवर्तन सुरू झाले. हा विजय शेतकऱ्यांच्या एकजुटीचा आणि पक्षीय मतभेद बाजूला ठेवून उभारलेल्या सामूहिक संघर्षाचा असल्याची भावना व्यक्त होत आहे.
धोम धरण पाणी बचाव संघर्ष समितीच्या नेतृत्वाखाली लाभक्षेत्रातील शेतकऱ्यांनी पाण्यासाठी आक्रमक भूमिका घेतली होती. या आंदोलनात राजकीय मतभेद बाजूला सारून सर्वपक्षीय पदाधिकारी, विविध संघटनांचे प्रतिनिधी, उत्तर कराड व कोरेगावचे आमदार आणि गावोगावचे शेतकरी सहभागी झाले. प्रत्येक गावातून मोठ्या संख्येने शेतकरी आंदोलनात उतरले. दोन हजारांहून अधिक शेतकऱ्यांच्या सहभागामुळे आंदोलनाला व्यापक स्वरूप प्राप्त झाले.
धोम धरणाच्या पाण्याचा प्रश्न मार्गी लागावा, यासाठी संघर्ष समितीने प्रशासनासमोर ठोस भूमिका मांडली. केवळ आश्वासनांवर समाधान न मानता प्रत्यक्ष कालव्यातून पाणी सोडले जाईपर्यंत आंदोलन सुरू ठेवण्याचा निर्धार शेतकऱ्यांनी व्यक्त केला. शेतकऱ्यांचा वाढता दबाव आणि संघर्ष समितीची ठाम भूमिका लक्षात घेऊन जलसंपदा मंत्र्यांनी पाणी सोडण्याचे आदेश दिले. त्यानंतर कालव्यातून पाण्याचे आवर्तन सुरू झाले.
या आंदोलनाने शेतकऱ्यांच्या प्रश्नांवर राजकीय मतभेद बाजूला ठेवून एकत्र येण्याची ताकद पुन्हा एकदा दाखवून दिली. सर्वपक्षीय नेते, लोकप्रतिनिधी, विविध संघटनांचे कार्यकर्ते आणि शेतकरी एकाच मागणीसाठी एकवटल्याने संघर्षाला बळ मिळाले. शेतकऱ्यांच्या एकजुटीने प्रशासनाला जाब विचारला आणि सामूहिक प्रयत्नांतून मागणी पूर्ण करून घेतली.
या यशस्वी लढ्यात खंबीरपणे साथ देणारे सर्वपक्षीय पदाधिकारी, लोकप्रतिनिधी, विविध संघटनांचे प्रतिनिधी, कार्यकर्ते आणि शेतकरी बांधवांचे संघर्ष समितीने आभार मानले.