सातारा : सातारा शहरातील एसटी स्टँड परिसरात वाहतूक नियमांचे उल्लंघन करणाऱ्या रिक्षाचालकांविरोधात शहर वाहतूक शाखा आणि प्रादेशिक परिवहन विभागाने (आरटीओ) संयुक्त कारवाई केली. शुक्रवारी सकाळी अचानक नाकाबंदी करून रिक्षांची तपासणी करण्यात आली. या मोहिमेत गणवेश न परिधान करणाऱ्या रिक्षाचालकांविरोधात मोटार वाहन कायद्यान्वये ५४ केसेस दाखल करण्यात आल्या असून, त्यांच्याकडून एकूण ५४ हजार ५०० रुपयांचा दंड आकारण्यात आला. अवघ्या पावणेदोन तासांत झालेल्या या कारवाईमुळे नियमांचे उल्लंघन करणाऱ्या रिक्षाचालकांचे धाबे दणाणले आहेत.
सातारा एसटी स्टँड परिसरात प्रवाशांची मोठी वर्दळ असते. या ठिकाणी रिक्षांची ये-जा सातत्याने सुरू असते. प्रवाशांच्या वाहतुकीसाठी महत्त्वाच्या असलेल्या या परिसरात रिक्षाचालकांनी वाहतूक नियमांचे पालन करावे, तसेच प्रवाशांना सुरक्षित आणि नियमानुसार सेवा द्यावी, या उद्देशाने वाहतूक शाखा आणि आरटीओने संयुक्त मोहीम राबवली. शुक्रवारी सकाळी ११.४५ ते दुपारी १.३० या वेळेत नाकाबंदी करून रिक्षांची तपासणी करण्यात आली. यावेळी विशेषतः गणवेश न परिधान करणाऱ्या चालकांवर दंडात्मक कारवाई करण्यात आली.
वाहतूक शाखेचे प्रभारी सहाय्यक पोलीस निरीक्षक राजेश माने, मोटार वाहन निरीक्षक अर्जुन मेलगिरी आणि सहाय्यक मोटार वाहन निरीक्षक संग्राम देवणे यांच्या उपस्थितीत ही कारवाई करण्यात आली. रिक्षाचालकांनी वाहन चालवताना आवश्यक नियमांचे पालन करणे गरजेचे असल्याचे अधिकाऱ्यांनी स्पष्ट केले. गणवेश परिधान करणे, वाहनाशी संबंधित आवश्यक कागदपत्रे जवळ ठेवणे, प्रवाशांकडून मीटरप्रमाणे भाडे आकारणे आणि प्रवाशांशी सौजन्याने वागणे या बाबींकडे चालकांनी गांभीर्याने लक्ष द्यावे, असे आवाहन त्यांनी केले.
रिक्षा हे शहरातील सार्वजनिक वाहतुकीचे महत्त्वाचे साधन आहे. अनेक प्रवासी दैनंदिन कामांसाठी, रेल्वे स्थानक किंवा एसटी स्टँडवर जाण्यासाठी रिक्षांचा वापर करतात. त्यामुळे रिक्षाचालकांनी वाहतूक नियमांचे पालन करण्याबरोबरच प्रवाशांना योग्य सेवा देणे अपेक्षित आहे. नियमांचे पालन झाल्यास वाहतुकीतील शिस्त राखण्यास मदत होईल, तसेच प्रवाशांनाही सुरक्षित आणि विश्वासार्ह सेवा मिळू शकेल.
दरम्यान, यापुढेही शहरातील विविध भागांत अचानक नाकाबंदी करून रिक्षांची तपासणी केली जाणार असल्याचा इशारा वाहतूक शाखा आणि आरटीओच्या अधिकाऱ्यांनी दिला आहे. नियमांचे उल्लंघन करणाऱ्या चालकांविरोधात कायद्यानुसार कारवाई केली जाईल, असेही स्पष्ट करण्यात आले. त्यामुळे रिक्षाचालकांनी दंडात्मक कारवाई टाळण्यासाठी नव्हे, तर वाहतुकीची शिस्त आणि प्रवाशांची सुरक्षितता लक्षात घेऊन नियमांचे नियमित पालन करावे, अशी अपेक्षा व्यक्त होत आहे.
या संयुक्त मोहिमेत पोलीस उपनिरीक्षक पिसाळ आणि शेलार यांच्यासह पोलीस हवालदार खरमाटे व वाघमळे, पोलीस शिपाई नावडकर, भोये, देखणे आणि चव्हाण तसेच महिला पोलीस शिपाई पवार यांनी सहभाग घेतला.