सातारा : सातारा जिल्ह्यातून दोन वर्षांसाठी हद्दपार करण्यात आलेले असतानाही कोणतीही लेखी परवानगी न घेता सातारा शहरात वावरताना आढळून आल्याने रोहित जितेंद्र भोसले (वय 27, रा. प्रतापसिंहनगर, खेड, सातारा) याच्याविरुद्ध सातारा शहर पोलीस ठाण्यात गुन्हा दाखल करण्यात आला आहे.
याबाबतची फिर्याद पोलीस कॉन्स्टेबल मच्छद्रिंनाथ शिवाजी माने (वय - 30, नेमणूक सातारा शहर पोलीस ठाणे) यांनी दिली आहे. पोलिसांनी दिलेल्या माहितीनुसार, मंगळवारी (दि. 13 ऑक्टोबर) दुपारी 1.50 वाजण्याच्या सुमारास शाहू चौक ते चारभिंतीकडे जाणार्‍या रस्त्यावरील वळणावर असलेल्या बंद टपरीजवळ रोहित भोसले हा आढळून आला. त्याला दोन वर्षांसाठी संपूर्ण सातारा जिल्ह्यातून हद्दपार करण्यात आले होते. असे असतानाही हद्दपार प्राधिकरण तथा पोलीस अधीक्षक, सातारा किंवा महाराष्ट्र शासनाची लेखी परवानगी न घेता जिल्ह्यात प्रवेश करून वावरल्याचे पोलिसांच्या निदर्शनास आले. पोलीस हवालदार साबळे तपास करीत आहेत.