पुणे : पुण्यातील नवी पेठ परिसरात MPSC आणि महाराष्ट्र शासनाविरोधात आंदोलन केल्याप्रकरणी विद्यार्थी प्रतिनिधींसह १५ जणांविरोधात विश्रामबाग पोलीस ठाण्यात गुन्हा दाखल करण्यात आला आहे. या कारवाईवर राष्ट्रवादी काँग्रेसचे आमदार रोहित पवार यांनी आक्षेप घेत पोलिसांच्या कार्यपद्धतीवर प्रश्नचिन्ह उपस्थित केले आहे. विद्यार्थ्यांवर दाखल करण्यात आलेल्या गुन्ह्यांवरून रोहित पवार यांनी सोशल मीडियावरील पोस्टद्वारे पुणे पोलीस आयुक्तांना लक्ष्य केले. विद्यार्थ्यांच्या आंदोलनाला १ ऑक्टोबर रोजी सुरुवात झाली होती. मात्र, त्या दिवशी काही विद्यार्थी आंदोलनस्थळी उपस्थित नसतानाही त्यांची नावे गुन्ह्यात समाविष्ट करण्यात आल्याचा आरोप त्यांनी केला.
पेपरफुटीचा मुद्दा समोर आणणारे ऋषिकेश गांगुर्डे यांच्यासह ओमकार पाटील, गजानन शेळके, सोमनाथ चव्हाण आणि संकेत कणसे हे संबंधित दिवशी इंदुलाल कॉम्प्लेक्सजवळ उपस्थित नव्हते, तर ते गावी होते, असा दावा रोहित पवार यांनी केला. असे असताना पोलिसांनी त्यांना घटनास्थळी कसे पाहिले, असा सवालही त्यांनी उपस्थित केला.
पुणे पोलीस आयुक्त साहेब, किती खोटे बोलणार? किती खोट्या FIR करणार? विद्यार्थ्यांच्या सत्याग्रहाला १ ऑक्टोबर रोजी सुरुवात झाली. त्या दिवशी इंदुलाल कॉम्प्लेक्सजवळ पेपरफुटी समोर आणणारा ऋषिकेश गांगुर्डे याच्यासह ओमकार पाटील, गजानन शेळके, सोमनाथ चव्हाण आणि संकेत कणसे उपस्थित नसताना, ते गावी असतानादेखील त्या दिवशी इंदुलाल कॉम्प्लेक्सजवळ पोलिसांना कसे दिसले? विद्यार्थ्यांचे वर्णन करताना प्रमोद पाटील यांचे लिंग महिला दाखवले आहे, तर प्रियांका चौधरी यांचे लिंग पुरुष दाखवले आहे. FIR मध्ये इतक्या चुका?? हे सर्व पाहता, FIR करणारा अधिकारी पेपर फोडून आला की काय, असा प्रश्न पडतो… असो, वरून मालकाचे आदेश ऐकून पोलीस वागायला लागले की असेच होते. हे विद्यार्थ्यांवरील सरकारचे दबावतंत्र आहे. पण या दबावाला विद्यार्थी घाबरणार नाहीत. हे सर्व गुन्हे जामीनपात्र असून, वकिलांची मोठी फौज आम्ही उभी केली आहे. त्यामुळे सरकारने असे खोटे गुन्हे दाखल करण्यापेक्षा भ्रष्ट भीमनवारला पदावरून हाकलावे. तो सरकारचा जावई आहे का? खोटे गुन्हे नोंदवायची एवढी हौस असेलच, तर विद्यार्थ्यांवरील गुन्हे रद्द करून माझ्यावर गुन्हे नोंद करा!
FIR मधील नोंदींवरही आक्षेप
गुन्हा दाखल करताना तयार करण्यात आलेल्या प्रथम माहिती अहवालात (FIR) काही गंभीर चुका असल्याचा आरोप रोहित पवार यांनी केला आहे. त्यांच्या म्हणण्यानुसार, प्रमोद पाटील यांचे लिंग महिला, तर प्रियांका चौधरी यांचे लिंग पुरुष असे नमूद करण्यात आले आहे. FIR मधील या कथित त्रुटींवरून त्यांनी पोलिसांच्या तपास प्रक्रियेवर प्रश्न उपस्थित केले. विद्यार्थ्यांवर दाखल करण्यात आलेले गुन्हे हे सरकारकडून दबाव आणण्याचे तंत्र असल्याचा आरोपही त्यांनी केला. मात्र, या आरोपांबाबत पोलिसांची अधिकृत बाजू किंवा FIR मधील नोंदींची स्वतंत्र पुष्टी उपलब्ध झालेली नाही.
'विद्यार्थ्यांवरील गुन्हे रद्द करा, माझ्यावर गुन्हे दाखल करा'
विद्यार्थ्यांवर दाखल झालेले गुन्हे जामीनपात्र असल्याचे सांगत रोहित पवार यांनी विद्यार्थ्यांच्या बाजूने वकिलांची मोठी फौज उभी केल्याचा दावा केला. विद्यार्थ्यांना अशा कारवाईमुळे घाबरवता येणार नाही, असेही त्यांनी स्पष्ट केले. याचबरोबर त्यांनी भ्रष्टाचाराच्या आरोपांवरून भीमनवार यांना पदावरून हटवण्याची मागणी केली. विद्यार्थ्यांवरील गुन्हे रद्द करून त्यांच्याऐवजी माझ्यावर गुन्हे दाखल करावेत, असे आव्हानही रोहित पवार यांनी पोलिसांना दिले.
MPSC आंदोलनाचा वाद आणखी चिघळणार?
विद्यार्थ्यांवरील गुन्हे दाखल झाल्यानंतर या प्रकरणाला राजकीय आणि प्रशासकीय महत्त्व प्राप्त झाले आहे. एका बाजूला आंदोलनकर्त्यांवर पोलिसांनी केलेली कारवाई, तर दुसऱ्या बाजूला FIR मधील कथित त्रुटी आणि पोलिसांवरील रोहित पवार यांचे आरोप यामुळे वाद वाढण्याची शक्यता आहे. या प्रकरणात पोलिसांची अधिकृत भूमिका, FIR मधील नोंदींबाबतचे स्पष्टीकरण आणि पुढील कायदेशीर कारवाई याकडे आता लक्ष लागले आहे.