सातारा : क्रांतीसूर्य महात्मा जोतिराव फुले यांच्या द्विशताब्दी जयंती वर्षाचे औचित्य साधून राबवण्यात येत असलेल्या 'महात्मा जोतिराव फुले महसूल लोकअदालत अभियाना'अंतर्गत सातारा उपविभागात पहिल्या टप्प्यात २५ प्रलंबित महसुली दावे दोन्ही पक्षकारांच्या सहमतीने व तडजोडीने कायमस्वरूपी निकाली काढण्यात आले.
महाराष्ट्र शासनाच्या महसूल व वन विभागाच्या निर्देशानुसार महसूल प्रशासनातील प्रलंबित अर्धन्यायिक प्रकरणांचा जलद गतीने निपटारा करण्यासाठी १ सप्टेंबर २०२६ ते ३१ मार्च २०२७ या कालावधीत हे विशेष अभियान राबवले जात आहे. या अंतर्गत ५ ऑक्टोबर २०२६ रोजी उपविभागीय अधिकारी कार्यालय सातारा, तहसीलदार कार्यालय सातारा व जावली तसेच संबंधित मंडल अधिकारी कार्यालयांमध्ये दोन सत्रांत पहिल्या टप्प्यातील लोकअदालत पार पडली.
या लोकअदालतीमध्ये सातारा उपविभागीय अधिकारी कार्यालयातील रस्ता, कुळकायदा व आरटीएस अपील संदर्भातील १५ प्रकरणांत तडजोडीने निर्णय देण्यात आला. तसेच सातारा तहसीलदार व मंडल अधिकारी कार्यालयातील ८, तर जावली तहसीलदार व मंडल अधिकारी कार्यालयातील २ अशा एकूण २५ जुन्या प्रकरणांचा यशस्वी निपटारा झाला. वर्षानुवर्षे सुरू असलेले महसुली तंटे सामोपचाराने मिटल्याने वेळ व पैशांची बचत झाल्याची भावना नागरिकांनी व्यक्त केली. दरम्यान, या अभियानातील पुढील महसूल लोकअदालत ७ डिसेंबर २०२६ रोजी आयोजित करण्यात येणार असून नागरिकांनी प्रलंबित दावे सामोपचाराने निकाली काढण्यासाठी उपस्थित राहावे, असे आवाहन सातारा उपविभागीय अधिकारी आशिष बारकुल यांनी केले आहे.