सातारा : औंध (ता. खटाव) येथील जीवन महादेव कांबळे यांनी गट क्रमांक ३६३ मधील जमिनीच्या वादातून आपल्यासह कुटुंबावर मानसिक, सामाजिक व आर्थिक अन्याय होत असल्याचा आरोप केला आहे. याप्रकरणी त्यांनी आज जिल्हाधिकारी कार्यालयासमोर बेमुदत आमरण उपोषण सुरू केले आहे.
कांबळे यांनी जिल्हाधिकाऱ्यांना दिलेल्या निवेदनात माजी सनदी अधिकारी भरत शितोळे, रणजीत पवार व त्यांच्या कुटुंबीयांवर विविध आरोप केले आहेत. आपल्या कुटुंबाविरुद्ध खोटे गुन्हे दाखल करण्यात आले असून महसूल व पोलिस प्रशासनाकडूनही योग्य दखल घेतली जात नसल्याचा दावा त्यांनी केला आहे. गट क्रमांक ३६३ बाबतचे फेरफार बेकायदेशीररीत्या रद्द करण्यात आल्याचा आरोपही त्यांनी केला आहे.
कुटुंबाच्या सुरक्षिततेसाठी प्रतिबंधात्मक कारवाई करावी, संबंधित फेरफार प्रकरणाची खात्यांतर्गत चौकशी करावी, तसेच संबंधित व्यक्तींच्या मालमत्ता व दूरध्वनी संपर्कांची चौकशी करावी, अशा मागण्या त्यांनी निवेदनातून केल्या आहेत. या मागण्यांवर कार्यवाही न झाल्यास उपोषण सुरू ठेवण्याचा इशारा त्यांनी दिला आहे.