मुंबई : राष्ट्रवादी काँग्रेसच्या विलीनीकरणाबाबत सुरू असलेल्या चर्चांवर राष्ट्रवादी काँग्रेसचे अध्यक्ष शरद पवार यांनी स्पष्ट भूमिका मांडली आहे. “आपल्याबाबत वेगवेगळ्या चर्चा सुरू आहेत. हो, चर्चा सुरू आहे. पण मला त्यांना सांगायचं आहे, आपण कुठेही जाणार नाही. आम्ही कुणासोबत जाणार नाही. यायचं असेल तर आमच्यासोबत या,” असे शरद पवार यांनी स्पष्ट शब्दांत सांगितले. त्यांच्या या वक्तव्यामुळे विलीनीकरणाच्या चर्चेच्या पार्श्वभूमीवर पक्षाची भूमिका त्यांनी स्पष्ट केली आहे.
शरद पवार यांच्या उपस्थितीत झालेल्या बैठकीत विविध विषयांवर चर्चा झाली. सुमारे अडीच तास बैठक सुरू होती. यावेळी दुष्काळाच्या पार्श्वभूमीवर विविध मागण्या त्यांच्यासमोर मांडण्यात आल्या. प्रांताध्यक्षांनी दिलेल्या सूचनांनुसार आंदोलनाच्या वेळी सरकारला कोणत्या मागण्यांचे निवेदन द्यायचे, याबाबतही माहिती देण्यात आली.
‘दुष्काळाच्या निमित्ताने सरकारने हात बळकट करणे गरजेचे’
दुष्काळाच्या परिस्थितीवर बोलताना शरद पवार यांनी राज्य सरकारसोबतच केंद्र सरकारच्या भूमिकेचाही उल्लेख केला. दुष्काळाच्या निमित्ताने सरकारने जनतेचे हात बळकट करणे गरजेचे असल्याचे त्यांनी सांगितले. दुष्काळाच्या काळात राज्यात काही निर्णय घेतले जातात, त्याचप्रमाणे केंद्र सरकारच्या पातळीवरही निर्णय होत असल्याचे पवार यांनी नमूद केले. केंद्रीय मंत्रिमंडळात असतानाचा अनुभव सांगताना त्यांनी तत्कालीन पंतप्रधान मनमोहन सिंग यांनी दुष्काळाच्या काळात खासदारांना अधिक अधिकार देण्याबाबत केलेल्या चर्चेचा उल्लेख केला.
मोसंबी उत्पादकांना मदतीचा निर्णय घेतल्याची आठवण
जालना जिल्ह्यातील आपल्या दौऱ्याचा संदर्भ देताना पवार यांनी मोसंबी उत्पादकांच्या प्रश्नाचा उल्लेख केला. जालना जिल्ह्यात मोठ्या प्रमाणात मोसंबीच्या बागा असल्याचे त्यावेळी राजेश टोपे यांनी आपल्याला सांगितल्याचे त्यांनी नमूद केले.मोसंबी पिकाला यापूर्वी मदत मिळत नसल्याचे लक्षात आल्यानंतर आपण दिल्लीला गेल्यावर मोसंबी पिकासाठी २५ हजार रुपयांची मदत देण्याचा निर्णय जाहीर केल्याची आठवणही पवार यांनी सांगितली.
‘AI समजून घेण्याची मानसिकता तयार करावी’
शरद पवार यांनी आपल्या भाषणात कृत्रिम बुद्धिमत्तेच्या (AI) वाढत्या प्रभावावरही भाष्य केले. महाराष्ट्रात AI शिकवण्यासाठी बारामतीमध्ये पहिली संस्था स्थापन करण्यात आल्याचे त्यांनी सांगितले. नुकतीच या संस्थेला भेट दिल्याचा अनुभवही त्यांनी कार्यकर्त्यांसमोर मांडला.
संस्थेत प्रवेश करताच दोन रोबोंनी आपल्याला सलामी दिली आणि त्यांनी अनेक गोष्टी करून दाखवल्याचे पवार यांनी सांगितले. “जगात अनेक प्रश्न कृत्रिम बुद्धिमत्ता सोडवू शकेल. त्यामुळे ते शिकायला लागेल. किमान आपण तो विषय समजून घ्यायला हवा,” असे त्यांनी सांगितले.
निवडणुकीतही AI चा वापर होण्याची शक्यता
जितेंद्र आव्हाड यांनी निवडणूक प्रक्रियेत सध्या काय घडत आहे, याबाबत माहिती दिल्याचे पवार यांनी सांगितले. भविष्यात कृत्रिम बुद्धिमत्तेशी संबंधित साधनांचा निवडणूक प्रक्रियेत वापर होण्याची शक्यता असल्याचेही त्यांनी नमूद केले. या बदलांच्या पार्श्वभूमीवर पक्षालाही याबाबत काहीतरी करण्याची गरज असल्याचे पवार यांनी सांगितले. कार्यकर्त्यांनी AI संदर्भातील लेख वाचावेत, हा विषय समजून घ्यावा आणि त्याबाबतची मानसिकता तयार करावी, असे आवाहन त्यांनी केले.