सातारा : मरळी येथील प्राथमिक आरोग्य केंद्राच्या इमारतीचे सुरू असलेले काम गतीने पूर्ण करण्यासाठी जिल्हा परिषदेच्या मुख्य कार्यकारी अधिकारी याशनी नागराजन यांनी संबंधित यंत्रणेला दहा दिवसांची मुदत दिली आहे. आरोग्य केंद्रातील विविध सुविधांची पाहणी करतानाच त्यांनी बांधकामाच्या प्रगतीचा प्रत्यक्ष आढावा घेतला.
याशनी नागराजन यांनी बुधवारी (दि. 16) प्राथमिक आरोग्य केंद्राला भेट देऊन रुग्णांना उपलब्ध करून दिल्या जाणार्‍या आरोग्य सेवा, सुविधा आणि केंद्रातील व्यवस्थेची माहिती घेतली. आरोग्य केंद्रात येणार्‍या नागरिकांना आवश्यक उपचार व सेवा वेळेत मिळतील, यासाठी संबंधितांनी दक्ष राहण्याच्या सूचना त्यांनी दिल्या.
यानंतर त्यांनी केंद्राच्या नवीन इमारतीच्या सुरू असलेल्या बांधकामाची पाहणी केली. इमारतीतील रंगकाम, खिडक्या व दरवाजे बसविण्याचे काम अद्याप पूर्ण झाले नसल्याचे निदर्शनास आले. ही कामे अधिक विलंब न करता गुणवत्तापूर्ण पद्धतीने पूर्ण करण्याचे निर्देश त्यांनी दिले. उर्वरित कामे येत्या दहा दिवसांत पूर्ण करण्याची स्पष्ट सूचना संबंधित अधिकार्‍यांना देण्यात आली.
इमारतीतील विद्युतविषयक कामांबाबतही त्यांनी आढावा घेतला. इलेक्ट्रिकल विभागाशी समन्वय साधून त्यांच्या अखत्यारितील कामेही निर्धारित कालावधीत पूर्ण करण्याचे निर्देश त्यांनी दिले.
यावेळी पंचायत समितीच्या गटविकास अधिकारी सरिता पवार, उपअभियंता महेश पवार तसेच प्राथमिक आरोग्य केंद्राचे वैद्यकीय अधिकारी उपस्थित होते.