सातारा : पालिका शाळांतील विद्यार्थ्यांच्या गणवेशाचा प्रश्‍न यंदा सामाजिक सहभागातून मार्गी लागणार आहे. सातारा शहरातील 17 पालिका शाळांमधील तब्बल 1 हजार 385 विद्यार्थ्यांना नवरात्रीपूर्वी नवीन गणवेश देण्याचा संकल्प शिक्षण मंडळाने केला असून, या उपक्रमाला बिल्डर असोसिएशन ऑफ सातार्‍याने आर्थिक हातभार लावला आहे. असोसिएशनने गणवेशासाठी 2 लाख 11 हजार रुपयांची मदत केली आहे.
या मदतीचा धनादेश बिल्डर असोसिएशन ऑफ सातार्‍याचे चेअरमन कौस्तुभ मोरे, सेक्रेटरी निलेश शिंदे, व्हाईस चेअरमन हर्षद वालावलकर आणि खजिनदार शरद जाधव यांच्या वतीने शिक्षण मंडळाचे सभापती शंकरराव किर्दत यांच्याकडे देण्यात आला. यावेळी नगराध्यक्ष अमोल मोहिते, उपनगराध्यक्ष ऍड. दत्ता बनकर, स्वीकृत नगरसेवक शंकर माळवदे, गोटूशेठ भंडारी आदी उपस्थित होते.
पालिकेच्या शाळांमध्ये शिक्षण घेणार्‍या विद्यार्थ्यांना गणवेशासाठी आर्थिक अडचणी येऊ नयेत, यासाठी शिक्षण मंडळाने यंदा विशेष नियोजन केले आहे. सर्व विद्यार्थ्यांना एकाच वेळी नवीन गणवेश मिळावा, यासाठी गणवेश तयार करण्याचे काम खासगी कंत्राटदारामार्फत सुरू करण्यात आले आहे. नवरात्रीपूर्वी ही प्रक्रिया पूर्ण करण्याचे उद्दिष्ट ठेवण्यात आले आहे.
या उपक्रमासाठी सुमारे चार लाख रुपयांचा खर्च अपेक्षित आहे. त्यापैकी निम्म्याहून अधिक निधी बिल्डर असोसिएशनच्या मदतीतून उपलब्ध झाला आहे. उर्वरित रक्कम खासगी प्रायोजकांच्या माध्यमातून उभारण्यात येणार आहे. त्यामुळे निधी संकलनाबरोबरच गणवेशाच्या दर्जावर आणि वेळेत वितरणावर शिक्षण मंडळाला लक्ष द्यावे लागणार आहे.
शिक्षणासोबत विद्यार्थ्यांच्या गरजा पूर्ण होणेही महत्त्वाचे आहे. सामाजिक बांधिलकीच्या भावनेतून असोसिएशनने गणवेशासाठी मदत केली आहे. भविष्यातही अशा उपक्रमांना सहकार्य करण्याची भूमिका राहील,’ असे कौस्तुभ मोरे यांनी सांगितले. दरम्यान, गणवेशासाठी मिळालेल्या मदतीमुळे पालिका शाळांतील विद्यार्थ्यांना दिलासा मिळणार असून, उर्वरित निधी वेळेत उपलब्ध करून घेऊन नवरात्रीपूर्वी गणवेश वितरणाचे आव्हान शिक्षण मंडळासमोर आहे.