सातारा : पत्नीला भेटण्यासाठी तिच्या माहेरी गेलेल्या जावयाला सासरे, सासू व मेव्हण्याने शिवीगाळ करत जीवे मारण्याची धमकी दिल्याचा प्रकार शुक्रवार पेठेत घडला. याप्रकरणी तिघांविरुद्ध शाहूपुरी पोलिस ठाण्यात गुन्हा दाखल करण्यात आला आहे.
13 सप्टेंबर रोजी रात्री साडेदहाच्या सुमारास ही घटना घडली. रोहित प्रकाश कांबळे (वय 35, रा. बेळगुंदी, ता. गडहिंग्लज, जि. कोल्हापूर) यांनी याबाबत फिर्याद दिली.
कांबळे यांची पत्नी सध्या शुक्रवार पेठेतील माहेरी राहत आहे. पत्नीला भेटण्यासाठी कांबळे तेथे गेले होते. त्यावेळी काही कारणावरून सासरे अमीन शेख, सासू व मेव्हणा सरफराज शेख यांनी कांबळे आणि त्यांच्या पत्नीला शिवीगाळ केली. त्यानंतर दोघांना जीवे मारण्याची धमकी दिल्याचा आरोप आहे. घटनेमुळे परिसरात काही काळ तणाव निर्माण झाला. तपास पोलीस उपनिरीक्षक जगदाळे करीत आहेत.