सातारा : सातार्‍यातील सेव्हन स्टार इमारतीसमोरील भाजी मंडईत मोबाईल चोरुन पळणार्‍या चोरट्याला नागरिकांनी पकडून चोप दिला. संशयित परप्रांतीय अल्पवयीन असून त्याच्या विरुध्द शाहूपुरी पोलिस ठाण्यात गुन्हा दाखल झाला आहे.
रणजित विजयराव  मोहिते (वय 43, रा. राधिका रोड, सातारा) यांनी शाहूपुरी पोलिस ठाण्यात तक्रार दिली आहे.
याबाबत अधिक माहिती अशी, रविवारी सकाळी 8 वाजता ही घटना घडली आहे. रणजित मोहिते हे भाजी खरेदी करण्यासाठी भाजी मंडईत गेले होते. भाजी खरेदीमध्ये ते गुंतले असल्याचे पाहून एका मुलाने अलगद त्यांच्या खिशातील मोबाईल काढला. मोबाईल चोरुन संशयित तेथून निघून जात असताना ही बाब रणजित मोहिते यांच्या लक्षात आली. त्या मुलाचा पाठलाग करुन त्याला पकडले. मंडईत पळापळ झाल्याने नागरिक सतर्क झाले. संशयिताकडे मोबाईलबाबत विचारताच त्याने खिशातून मोबाईल काढून दिला.
मोबाईल चोरीची घटना समोर आल्यानंतर संतप्त जमावाने त्याला मारहाण केली. या घटनेत मुलगा किरकोळ जखमी झाला आहे.