सातारा : सातारा शहरासह जिल्ह्यात क्रिकेटचे खेळाडू मोठ्या संख्येने तयार होत आहेत. या खेळाडूंसाठी तसेच राज्य, राष्ट्रीय स्तरासह रणजी सामने सातार्‍यात खेळले जावेत आणि हे सामने पाहण्याचा आनंद सातारकरांना घेता यावा,  यादृष्टीने सातारा शहरात आंतरराष्ट्रीय दर्जाचे क्रिकेट स्टेडियम उभारण्यासाठी आपण प्रयत्नशील आहोत, असे राज्याचे सार्वजनिक बांधकाम मंत्री श्रीमंत छ. शिवेंद्रसिंहराजे भोसले यांनी स्पष्ट केले.
सातारा शहरातील ठक्कर सिटीच्या लगत आयुर्वेदिक गार्डन शेजारी सातारा नगर परिषदेच्या मालकीची सुमारे 11 एकर जागा असून या जागेमध्ये सर्व सोयी सुविधांनी युक्त सुसज्ज आणि प्रशस्त असे क्रिकेट स्टेडियम उभारण्याची मागणी जिल्हा क्रिकेटप्रेमींनी ना. शिवेंद्रसिंहराजे यांना होती. त्यांच्या मागणीला ना. शिवेंद्रसिंहराजे यांनी सकारात्मक प्रतिसाद दिला असून आज त्यांनी प्रत्यक्ष जागेची पाहणी केली.                                                                      याप्रसंगी सातारा जिल्हा परिषदेचे उपाध्यक्ष राजू भोसले, पालिकेचे नगराध्यक्ष अमोल मोहिते, नगरसेवक अविनाश कदम, जयंत महाजनी, इर्शाद बागवान, निशांत गवळी, धैर्यशील भोसले, पिंटू साळुंखे, भालचंद्र निकम यांच्यासह पदाधिकारी व संबंधित अधिकारी उपस्थित होते.
सातारा शहरात एक दर्जेदार क्रिकेट स्टेडियम असावे, यादृष्टीने आपले प्रयत्न सुरु असून त्याचसाठी प्रस्तावित जागेची पाहणी करण्यात आल्याचे ना. शिवेंद्रसिंहराजे यांनी प्रसारमाध्यमांशी बोलताना सांगितले. संबंधित अधिकार्‍यांनी तातडीने जागेची मोजणी व इतर बाबींचा अहवाल शासनाकडे सादर करावा, अशा सूचना ना. शिवेंद्रसिंहराजे भोसले यांनी उपस्थित अधिकार्‍यांना यावेळी केल्या.