सातारा : शनिवार पेठेतील जुन्या प्रभात टॉकीजमागील बंद घराचा मागील दरवाजा उघडून अज्ञाताने घरातील सोन्या-चांदीचे दागिने व रोकड असा ६० हजार १०० रुपयांचा ऐवज चोरून नेल्याची घटना उघडकीस आली. ही चोरी २१ ऑगस्ट ते ६ सप्टेंबर या कालावधीत घडली. याबाबत शालन श्रीराम जाधव (वय ६९) यांनी सातारा शहर पोलीस ठाण्यात फिर्याद दिली आहे.
फिर्यादीनुसार, चोरट्याने मागील दरवाजातून घरात प्रवेश करून कपाटातील सोन्याच्या दोन चेन, दोन अंगठ्या, एकदाणी, बांगडी, कानातील वेल, बुगडी, चांदीचा छल्ला व मासोळ्या तसेच १५ हजार रुपयांची रोकड असा मुद्देमाल नेला. या प्रकरणी अज्ञाताविरुद्ध घरफोडीचा गुन्हा दाखल करण्यात आला असून पोलीस हवालदार कणसे तपास करीत आहेत.