खंडाळा : सातारा- पुणे महामार्गावर पुणे बाजूकडे जाताना भरधाव येणाऱ्या मोटारीने पुढे जात असलेल्या ट्रकला पाठीमागून जोराची धडक दिली. या अपघातात मोटार ट्रकच्या खाली घुसली.अपघातात पती गंभीर जखमी झाला असून, पत्नी किरकोळ जखमी आहे. ही घटना आज दुपारी शिरवळ येथे घडली. एका आठवड्यात अपघाताची ही तिसरी घटना आहे.

याबाबत माहिती अशी, की साताऱ्याहून पुण्याला जाताना शिरवळ येथे वेगात येणाऱ्या मोटारीवरील (एएमएच ११ डीयू ७३०३) चालकाचे नियंत्रण सुटल्याने तिने ट्रकला (एमएच १४ जीएल ३९००) पाठीमागून जोराची धडक दिली.

यामध्ये एअर बॅग उघडल्याने सुदैवाने जीवितहानी टळली, तर मोटारचालक विक्रम संभाजी दोरगे (रा. वाठार स्टेशन, ता. कोरेगाव) हे गंभीर जखमी झाले. त्यांची पत्नी स्वाती विक्रम दोरगे या किरकोळ जखमी झाल्या असून, त्या शिरवळ येथील खासगी रुग्णालयात उपचार घेत आहेत. तपास पोलिस हवालदार केंगळे करीत आहेत.