सातारा :बारामती स्पोर्ट्स फाउंडेशनतर्फे आयोजित करण्यात आलेल्या पुणे ते बारामती आरोग्यवारी मॅरेथॉनमध्ये साताऱ्याच्या 'सातारा हिल रनर्स' ग्रुपच्या धावपटूंनी विविध गटांमध्ये उल्लेखनीय कामगिरी करत साताऱ्याचा झेंडा दिमाखात फडकवला आहे. या स्पर्धेत १०० किलोमीटर अंतराच्या थरारक शर्यतीत साताऱ्याचे डॉ. सुधीर पवार यांनी द्वितीय क्रमांक पटकावत साताऱ्याच्या शिरपेचात मानाचा तुरा रोवला.

१०० किलोमीटर गटात डॉ. सुधीर पवार चमकले

अतिशय खडतर मानल्या जाणाऱ्या १०० किलोमीटरच्या स्पर्धेत सातारा हिल रनर ग्रुपचे कोच व मार्गदर्शक डॉ. सुधीर पवार यांनी अवघ्या ११ तास ५४ मिनिटांत हे अंतर पूर्ण करून सर्वांमध्ये द्वितीय (दुसरा) क्रमांक पटकावला. त्यांच्या या यशाबद्दल साताऱ्यातून कौतुक होत आहे. त्यांच्यासोबतच ओमप्रसाद यादव, मोहन शेळके, शरद थोरात आणि अमोल जाधव यांनीही ही १०० किमीची स्पर्धा यशस्वीरित्या पूर्ण केली.

५० किलोमीटर गटात १४ धावपटूंची यशस्वी दौड

स्पर्धेतील ५० किलोमीटरच्या गटामध्ये साताऱ्याच्या तब्बल १४ धावपटूंनी यश मिळवले. यामध्ये राहुल दहीदुले, नामदेव घनवट, हेमंत थोरात, लक्ष्मी कदम, दीपक कदम, उत्तम देसाई, मंगेश प्रधान, जयसिंग चव्हाण, दत्तात्रय पवार, हेमंत बाबर, रमेश डंगरे, अतुल देशमुख, संजय देशमुख आणि मिलिंद हळबे यांनी धाव पूर्ण करत फिनिशर मेडलवर आपले नाव कोरले.

२१ किलोमीटर गटातही साताऱ्याचा दबदबा

हाफ मॅरेथॉन म्हणजेच २१ किलोमीटरच्या स्पर्धेत भीमराव वाघ, राजशेखर सर, धनराज कांबळे, डॉ. दीपक कदम, संदीप मांडरे, निवांत गळवे आणि प्रमोद कदम यांनी उत्कृष्ट सहभाग नोंदवत ही स्पर्धा यशस्वीरीत्या पूर्ण केली.

धावपटूकेंद्री आणि उत्कृष्ट मोफत नियोजन

या स्पर्धेमध्ये १०० किमी, ५० किमी, २१ किमी आणि १० किमी अशा विविध अंतरांच्या स्पर्धांचे आयोजन करण्यात आले होते. धावपटूंच्या सोयीसाठी प्रत्येक दोन ते तीन किलोमीटरवर हायड्रेशन पॉइंटची उत्तम व्यवस्था करण्यात आली होती. संपूर्ण आयोजन अत्यंत नियोजनबद्ध, सुरक्षित आणि धावपटूकेंद्री होते.

विशेष म्हणजे, ही संपूर्ण स्पर्धा धावपटूंसाठी पूर्णपणे मोफत आयोजित करण्यात आली होती. ५० आणि १०० किलोमीटर स्पर्धा पूर्ण करणाऱ्या सर्व धावपटूंना आकर्षक ट्रॉफी देऊन सन्मानित करण्यात आले. आयोजकांचे उत्कृष्ट नियोजन, आदरातिथ्य आणि धावपटूंप्रती असलेली बांधिलकी निश्चितच कौतुकास्पद ठरली. राज्य आणि देशपातळीवर साताऱ्याचे नाव उज्ज्वल करणाऱ्या सातारा हिल रनर्सच्या सर्व विजयी व सहभागी धावपटूंचे सर्व स्तरांतून मनःपूर्वक अभिनंदन होत आहे.