सातारा : सातारा तालुक्यातील खिंडवाडी परिसरात परवानगीशिवाय साठवून ठेवण्यात आलेल्या स्फोटक साहित्यावर सातारा पोलिसांनी धडक कारवाई करत मोठा साठा जप्त केला आहे. या कारवाईत जिलेटीन कांड्या, अमोनियम नायट्रेट आणि डिटोनेटर असा मोठ्या प्रमाणावरील स्फोटक साहित्य हस्तगत करण्यात आले असून, संबंधितांविरुद्ध कायदेशीर कारवाईची प्रक्रिया सुरू करण्यात आली आहे.

पोलीस अधीक्षक निखिल पिंगळे यांना प्राप्त झालेल्या गोपनीय माहितीच्या आधारे उपविभागीय पोलीस अधिकारी राजीव नवले, शहर पोलीस निरीक्षक सचिन म्हेत्रे, तालुका पोलीस निरीक्षक निलेश तांबे आणि त्यांच्या पथकाने खिंडवाडी परिसरात शोधमोहीम राबवली. तपासादरम्यान एका ठिकाणी मोठ्या प्रमाणात स्फोटक साहित्य साठवून ठेवण्यात आल्याचे निदर्शनास आले.

या कारवाईत सुमारे ३०० किलो जिलेटीन, ३५० किलो अमोनियम नायट्रेट तसेच पाच बॉक्समधील जवळपास एक हजार डिटोनेटर जप्त करण्यात आले. संबंधित व्यक्तीकडे स्फोटक साहित्य साठविण्यासाठी आवश्यक असलेला वैध परवाना नसल्याचे तपासात स्पष्ट झाल्यानंतर पोलिसांनी संपूर्ण साहित्य ताब्यात घेतले.

प्राथमिक माहितीनुसार हे साहित्य खाणकामातील ब्लास्टिंगसाठी वापरण्याच्या उद्देशाने आणण्यात आले असावे, असा संशय व्यक्त करण्यात येत आहे. मात्र साठ्याचा नेमका मालक कोण, साहित्य कुठून आणण्यात आले आणि त्याचा वापर नेमका कोणत्या कामासाठी होणार होता, याचा तपास पोलीस करत आहेत.

जप्त साहित्याचा पंचनामा करण्यात आला असून स्फोटक पदार्थ कायद्यानुसार गुन्हा दाखल करण्याची कार्यवाही सुरू आहे. या प्रकरणातील इतर संभाव्य दुव्यांचाही पोलीस शोध घेत असून तपास सुरू आहे.