कराड : कराड येथील कोल्हापूर नाका परिसरात उभारण्यात येत असलेला बहुप्रतीक्षित उड्डाणपूल अखेर पूर्णत्वाच्या मार्गावर आला आहे. गेल्या दोन वर्षांपासून सुरू असलेल्या या प्रकल्पामुळे वाहनधारकांना मोठ्या प्रमाणावर वाहतूक कोंडीचा सामना करावा लागत होता. मात्र आता हा उड्डाणपूल येत्या २० जूनपर्यंत वाहतुकीसाठी खुला करण्यात येणार असल्याने महामार्गावरील प्रवाशांना मोठा दिलासा मिळणार आहे.

पुणे-बंगळुरु महामार्गावरील कऱ्हाड ते नांदलापूर दरम्यान उभारण्यात येत असलेला हा उड्डाणपूल सातारा ते कागल सहापदरीकरण प्रकल्पातील सर्वात मोठा उड्डाणपूल मानला जात आहे. पंकज हॉटेल ते नांदलापूर या दरम्यान उभारण्यात आलेल्या या पुलाची लांबी सुमारे ३.४७ किलोमीटर असून रुंदी २९.५ मीटर आहे. तब्बल ११५ खांबांवर (पिलर) हा भव्य उड्डाणपूल उभारण्यात आला आहे.

या उड्डाणपुलाचे काम गेल्या दोन वर्षांपासून सुरू असून विविध तांत्रिक कारणांमुळे प्रकल्पाला तीन वेळा मुदतवाढ देण्यात आली होती. त्यामुळे कामाचा वेग मंदावला आणि उड्डाणपूल पूर्ण होण्यास अपेक्षेपेक्षा जास्त कालावधी लागला. परिणामी कऱ्हाड शहरातील कोल्हापूर नाका परिसरात वाहनांच्या लांबच लांब रांगा लागणे ही रोजचीच बाब बनली होती. विशेषतः शनिवार, रविवार आणि सुट्टीच्या दिवशी पुणे-कोल्हापूर तसेच कोकण, गोवा आणि कर्नाटककडे जाणाऱ्या वाहनांची संख्या मोठ्या प्रमाणावर वाढत असल्याने येथे दोन ते तीन तासांपर्यंत वाहतूक ठप्प होत होती. त्यामुळे प्रवाशांसह व्यावसायिक वाहनचालक आणि स्थानिक नागरिकांमध्ये तीव्र नाराजी निर्माण झाली होती.

उड्डाणपूल वाहतुकीसाठी खुला झाल्यानंतर कऱ्हाड शहरातील कोल्हापूर नाका चौकातील वाहतुकीचा ताण मोठ्या प्रमाणात कमी होणार आहे. महामार्गावरील वाहने थेट उड्डाणपुलावरून मार्गक्रमण करू शकतील. त्यामुळे शहरातील अंतर्गत वाहतूक आणि राष्ट्रीय महामार्गावरील वाहतूक स्वतंत्रपणे सुरळीत होण्यास मदत होणार आहे.

यामुळे पुणे, सातारा, कऱ्हाड, कोल्हापूर तसेच कर्नाटककडे जाणाऱ्या प्रवाशांचा प्रवास अधिक जलद आणि सुरक्षित होणार आहे. विशेषतः मालवाहतूक करणाऱ्या वाहनांना वेळेची बचत होणार असून इंधन खर्चातही घट होण्याची अपेक्षा आहे.

अंतिम टप्प्यातील कामांना वेग

सध्या उड्डाणपुलावरील डांबरीकरण, सुरक्षा कठडे, दिशादर्शक फलक, रस्ते चिन्हांकन, प्रकाशयोजना तसेच इतर सुरक्षाविषयक उपाययोजनांची कामे अंतिम टप्प्यात सुरू आहेत. संबंधित यंत्रणांनी ही कामे युद्धपातळीवर हाती घेतली असून २० जूनपूर्वी सर्व कामे पूर्ण करण्याचे नियोजन करण्यात आले आहे.

पावसाळ्यापूर्वीच होणार उद्घाटन

यंदाच्या पावसाळ्यापूर्वी हा उड्डाणपूल वाहतुकीसाठी खुला करण्याचे उद्दिष्ट प्रशासनाने ठेवले आहे. त्यामुळे पावसाळ्यात महामार्गावरील वाहतूक सुरळीत ठेवण्यास मदत होणार आहे. उड्डाणपूल सुरू झाल्यानंतर गेल्या अनेक महिन्यांपासून वाहतूक कोंडीमुळे त्रस्त असलेल्या लाखो वाहनधारकांना मोठा दिलासा मिळणार असून पुणे-बंगळुरु महामार्गावरील प्रवास अधिक गतिमान होणार आहे.