कराड : आम्ही कराडचे भाई आहोत, विजय चौकात का थांबला असे आम्हाला विचारणार तू कोण ? असे म्हणत सात जणांनी दहशत माजविण्याचा प्रयत्न केला. इरफान आसिफ पठाण (रा. मंगळवार पेठ, कराड) आणि दर्शन शिंदे (गजानन हौसिंग सोसायटी, कराड) या दोघा मित्रांवर कोयत्याने हल्ला केल्याची खळबळजनक घटना मंगळवारी रात्री साडेअकरा वाजण्याच्या सुमारास घडली.

कराड बसस्थानक परिसरात कोयत्यासह दगड व लाथाबुक्क्यांनी साद अश्पाक मुलाणी (आझाद चौक कराड), हुजेफा शब्बीर शेख (गुरुवार पेठ, कराड) या दोघांसह सद्दाम गौसपाक शेख (कार्वे नाका, कराड), शोएब मोमीन (रा. रैनाक गल्ली, कराड), फरहान शेख (मुजावर कॉलनी कराड), अकरम मुल्ला (पाली, ता. कराड) आणि अनोळखी एक अशा सात जणांनी पठाण व शिंदे यांच्यावर हल्ला केला.

हल्ल्यावेळी परिसरातील रिक्षाचालक आणि नागरिकांनी घटनास्थळावरून पळ काढला होता. सुदैवाने पोलीस वेळीच दाखल झाल्यानंतर पठाण व शिंदे यांचा जीव वाचला असून दोघांवर कराडच्या खाजगी रुग्णालयात उपचार सुरू आहेत. याप्रकरणी कराड शहर पोलीस ठाण्यात गुन्हा दाखल झाला असून वरिष्ठ पोलीस निरीक्षक दत्तात्रय दराडे तपास करत आहेत.