पाचगणी : जगप्रसिद्ध 'पुस्तकाचे गाव'  भिलार (ता. महाबळेश्वर) येथे भारतरत्न डॉ. बाबासाहेब आंबेडकर यांची १३५ वी जयंती अत्यंत उत्साहात आणि जल्लोषात साजरी करण्यात आली. गावातील मुख्य रस्त्यांवर काढलेल्या मनमोहक रांगोळ्या आणि ठिकठिकाणी लावलेल्या अभिवादन बॅनरमुळे संपूर्ण भिलारनगरी निळ्या रंगात न्हाऊन निघाली होती.

कार्यक्रमाची सुरुवात भिलार ग्रामपंचायत येथे डॉ. बाबासाहेब आंबेडकरांच्या प्रतिमेला पुष्पहार अर्पण करून आणि अभिवादन करून करण्यात आली. यावेळी ग्रामपंचायत सदस्य आणि गावातील प्रतिष्ठित नागरिक मोठ्या संख्येने उपस्थित होते. केवळ ग्रामपंचायतच नव्हे, तर प्राथमिक शाळा आणि गावातील विविध संस्थांमध्येही बाबासाहेबांच्या विचारांचा जागर करण्यात आला.

शाळेत व्याख्यानमालेचे आयोजन

बाबासाहेबांचे विचार तळागाळापर्यंत आणि पुढच्या पिढीपर्यंत पोहोचावेत, या हेतूने जिल्हा परिषद शाळेमध्ये विशेष 'व्याख्यानमालेचे' आयोजन करण्यात आले होते. या उपक्रमाला विद्यार्थ्यांनी उत्स्फूर्त प्रतिसाद दिला. अनेक विद्यार्थ्यांनी बाबासाहेबांच्या जीवनावर आणि कार्यावर आपले विचार व्यक्त केले.

पाचगणी येथे महापरिनिर्वाण सोहळ्याची सांगता

दिवसभर विविध कार्यक्रमांनी भिलार दुमदुमून गेले होते. सायंकाळी गावातील सर्व अनुयायी आणि नागरिक पाचगणी येथील 'आंबेडकर गार्डन' येथे एकत्रित जमले. या ठिकाणी बाबासाहेबांना सामूहिक अभिवादन करून या दिमाखदार सोहळ्याची सांगता करण्यात आली.

मान्यवरांची उपस्थिती

या सोहळ्यासाठी पंचायत समिती सदस्य वंदना भिलारे, प्रवीण भिलारे, नितीन भिलारे, सरपंच शिवाजी भिलारे, अनिल भिलारे, तेजस्विनी भिलारे, वैशाली भिलारे, संतोष कांबळे, अशोक भिलारे, ग्रामसेवक राजेंद्र चव्हाण, विवेक कांबळे यांच्यासह ग्रामस्थ आणि भीमसैनिक मोठ्या संख्येने उपस्थित होते.

"बाबासाहेबांनी शिक्षणाचे महत्त्व सांगितले आहे, आणि पुस्तकाच्या गावातून त्यांच्या विचारांचा असा जागर होणे हीच त्यांना खरी आदरांजली आहे," अशी भावना यावेळी उपस्थितांनी व्यक्त केली.