सातारा : जिल्ह्यातील फलटणमध्ये माणुसकीला काळिमा फासणारी घटना समोर आली आहे. रुग्णालयात उपचारासाठी दाखल असलेल्या १८ वर्षीय मुलीच्या असहायतेचा फायदा घेत एका ओळखीच्या नराधमाने तिचे लैंगिक शोषण करण्याचा प्रयत्न केला. या प्रकरणी संबंधित मुलीने ओळखीच्या व्यक्तीविरुद्ध तक्रार दाखल केली आहे.

मिळालेल्या माहितीनुसार, दि. ९ एप्रिल २०२६ रोजी रात्री सुमारे ९ वाजण्याच्या सुमारास ही घटना घडली. संबंधित १८ वर्षांची मुलगी उपजिल्हा रुग्णालय, फलटण येथे उपचार घेत असताना तिच्या वॉर्डमध्ये तिच्या ओळखीचा अभिषेक अशोक सोडमिसे (रा. सोमंथळी, ता. फलटण, जि. सातारा) हा आला. त्यावेळी तिची आई डबा आणण्यासाठी बाहेर गेली होती.

संशयिताने महिलेची चौकशी करत तिच्या बेडवर बसत तिच्याशी बोलणे सुरू केले. त्यानंतर त्याने महिलेच्या गळ्याला हात लावून विनयभंग केल्याचा आरोप आहे. तसेच “तू सिंगल आहेस, आनंदी राहायला हवे” असे म्हणत गैरवर्तन केल्याचे तक्रारीत नमूद केले आहे. या प्रकारामुळे महिलेच्या मनात लज्जा व भीती निर्माण झाली असून तिने संबंधिताविरुद्ध कारवाईची मागणी केली आहे. या प्रकरणी पुढील तपास पोलिसांकडून सुरू आहे.