सातारा : रचनात्मक समाज हा मानवी कल्याणासाठी नेहमीच प्रेरक असतो. या रचनात्मक समाजासाठी त्यांना मार्गदर्शन करणारे बहुआयामी व्यक्तिमत्व दिशादर्शक ठरतात. भाजपच्या गटनेत्या व आचार्य सिद्धी पवार हे असेच व्यक्तिमत्त्व आहे. विविध क्षेत्रात आपल्या कामाचा ठसा उमटवणार्या सिद्धी ताई यांनी अल्पावधीत केलेले कार्य प्रेरणादायी आहे, असे उद्गार अभिनेते स्वप्निल जोशी यांनी काढले.
सक्सेस अबॅकस या राज्यस्तरीय संस्थेद्वारे येथील देविका मंगल कार्यालयात भाजपच्या गटनेत्या सिद्धी पवार यांना दुर्गा सन्मान पुरस्काराने सन्मानित करण्यात आले. त्यावेळी ते बोलत होते.
स्वप्निल जोशी पुढे म्हणाले, सामाजिक कार्यातील गले वीस वर्षातील सिद्धी पवार यांचे योगदान हे अतुलनीय आहे. नागरिकांशी असलेले जिव्हाळ्याचे संबंध आणि सातार्याची कन्या म्हणून माणुसकीच्या दृष्टिकोनातून त्यांनी केलेले कार्य हे कौतुकास्पद आहे. सिद्धी पवार यांनी ज्योतिषशास्त्र, वैदिक सायन्स, रंग चिकित्सा, कुंडलीनी जागृती, साहित्य या विविध विषयांवर आपला ठसा उमटवला आहे. उत्कृष्ट लेखिका व चित्रकार असणार्या सिद्धी ताई पवार यांची 19 पुस्तके प्रकाशित झाली आहेत. राजकीय क्षेत्रातही भाजपच्या गटनेत्या, सातारा पालिकेच्या सभागृह नेता, सार्वजनिक बांधकाम विभागाच्या माजी सभापती, जय जिजाऊ महिला नागरी संस्थेच्या संस्थापिका आणि 112 बचत गट तयार करून त्यांची वेगळी चळवळ उभी करणार्या सिद्धी पवार यांच्या कामाची दखल घेऊन सक्सेस अबॅकस यांच्या वतीने त्यांना दुर्गा सन्मान जाहीर करण्यात आला होता. या पुरस्काराचे वितरण त्यांना स्वप्निल जोशी यांच्या हस्ते करण्यात आले. सन्मानपत्र, शाल, श्रीफळ असे पुरस्काराचे स्वरूप होते.
रचनात्मक समाज हा अशाच बहुआयामी व्यक्तिमत्त्वामुळे पुढे जातो. अशा समाजात वैचारिक सकसपणा आणि एकजिनसीपणा तयार होतो. हेच देशाच्या प्रगतीचे खरे लक्षण आहे, असेही जोशी म्हणाले.
ताज्या घडामोडींसाठी व्हॉट्सॲप चॅनेलला फॉलो करा !
