वेव्हज 2025 समिटमध्ये अनेक भारतीय कलाकारांनी आपले अनुभव शेअर केले. सिनेसृष्टीविषयीचं आपलं मतही व्यक्त केलं. अभिनेत्री करीना कपूरनेही Waves 2025 मध्ये हजेरी लावली. यावळी तिने एका हॉलिवूड निर्मात्याचा किस्सा सांगितला. हॉलिवूड निर्मातेही आपले चित्रपट आवडीने बघतात आणि कौतुक करतात, असं ती म्हणाली. 

करीनाने  वेव्हज'च्या एका परिसंवादात सांगितलं की, "भारतीय चित्रपट आजकाल सगळेच लोक बघतात. हॉलिवूडमधील प्रसिद्ध चित्रपट दिग्दर्शक आणि निर्माते स्टीव्हन स्पीलबर्गसुद्धा आपले चित्रपट बघतात. ते आपल्या सिनेमांचं कौतुक करतात. करीना पुढे म्हणाली की, स्टीव्हन यांनी 'थ्री इडियट्स' सिनेमा बघून तिचं कौतुक केलं होतं. 'सिनेमा द सॉफ्ट पॉवर' या परिसंवादात चित्रपट निर्माता आणि दिग्दर्शक करण जोहरने दाक्षिणात्य सुपरस्टार विजय देवरकोंडा आणि बॉलिवूड अभिनेत्री करीना कपूर खान या दोघांची मुलाखत घेतली. यावेळी दोघांनी चित्रपटसृष्टीविषयीची आपली मतं मांडली."

करीना म्हणाली की, "मी परदेशात असताना एका रेस्टॉरंटमध्ये गेले. तिथे स्टीव्हन स्पीलबर्गही आले होते. ते माझ्याजवळ आले आणि मला म्हणाले 'तीन विद्यार्थ्यांची गोष्ट सांगणाऱ्या सिनेमात जी मुलगी आहे, ती तूच आहेस ना ?' मी बोलले, 'हो मीच ती. त्यांना 'थ्री इडियट्स' हा सिनेमा खूप आवडल्याचं त्यांनी सांगितलं. त्यांनी मला ओळखावं यासाठी मी इंग्रजी सिनेमात काम करण्याची गरज नाही. हीच आपल्या भारतीय चित्रपटांची खासियत आहे. भारतीय सिनेमा खूप श्रेष्ठ आहे."

दरम्यान हॉलिवूडमध्ये काम करण्याविषयीचा प्रश्नही करीनाला यावेळी विचारण्यात आला. तेव्हा हिंदी सिनेमातील प्रवासाविषयी समाधानी असल्याची प्रतिक्रिया तिने दिली. हॉलिवूडमध्ये काम करण्याची सध्या तरी इच्छा नसल्याचं तिने सांगितलं. 

ती म्हणाली, "माझा जन्मच एका 'फिल्मी' कुटुंबामध्ये झाला आहे. त्यामुळे चित्रपटात काम करणं हे माझ्या रक्तातच आहे. चांगल्या गोष्टीला मी नाही म्हणत नाही. पण एखाद्या गोष्टीच्या मागे लागण्याचा माझा स्वभाव नाही. जे घडायचं असतं ते नेहमी घडतंच. सिनेमा हिंदी असो किंवा इंग्लिश जे व्हायचं ते होणारच आहे." तिने सांगितलं की, "प्रेक्षकांच्या आवडीनिवडीतही बदल झाला आहे. पूर्वी हिंदी डब सिनेमे आवडीने बघितले जायचे. पण आता प्रादेशिक भाषांमधले सिनेमेही लोक अत्यंत आवडीनं पाहतात. हा बदल स्वागतार्ह आहे."