सातारा : अखिल भारतीय मराठी साहित्य महामंडळाचे कोषाध्यक्ष व साताऱ्यात होत असलेल्या ९९ व्या अखिल भारतीय मराठी साहित्य संमेलनाचे कार्याध्यक्ष विनोद कुलकर्णी यांचा गळा आवळून काळे फासत त्यांच्या डोळ्यांना इजा केल्याप्रकरणी संशयिताला अटक करण्यात आली. संशयिताला न्यायालयात हजर केले असता त्याला ६ जानेवारी रोजी पर्यंत तीन दिवसांची पोलिस कोठडी सुनावण्यात आली आहे.
साताऱ्यातील छत्रपती शाहू क्रीडा संकुलात शनिवारी दुपारी १२ वाजण्याच्या सुमारास ही घटना घडली होती. संमेलनातील प्रकाशन मंच या दालनात पुस्तक प्रकाशनाचा कार्यक्रम सुरु होता. यावेळी संशयित आरोपीने विनोद कुलकर्णी यांच्यावर झडप घालत त्यांचा गळा आवळला. त्यानंतर झटापट करत त्यांच्या तोंडाला काळे फासले. या सर्व घटनेनंतर परिसरात खळबळ उडाली व महाराष्ट्रभरात त्याचे संतप्त पडसाद उमटले. या घटनेनंतर पोलिसांनी संशयिताला ताब्यात घेतले. तर विनोद कुलकर्णी यांच्या डोळ्याला इजा झाल्याने त्यांना उपचारासाठी रुग्णालयात हलवण्यात आले.
शाहूपुरी पोलिस ठाण्यात याप्रकरणी गुन्हा दाखल झाल्यानंतर संशयित संदीप जाधव याला अटक करण्यात आली. रविवारी संशयिताला शाहूपुरी पोलिसांनी न्यायालयात हजर केले असता संशयिताला ६ जानेवारीपर्यंत पोलिस कोठडी सुनावण्यात आली. याप्रकरणी मूळ फिर्यादीतर्फे सरकारी वकील व त्यांना सहाय्य करणारे ॲड. श्रीकांत पन्हाळे यांनी युक्तीवाद केला होता. याबाबतचा अधिक तपास सपोनि शिर्के करत आहेत.
ताज्या घडामोडींसाठी व्हॉट्सॲप चॅनेलला फॉलो करा !
