सातारा : सातारा येथील जय भवानी नागरी सहकारी पतसंस्था सातारा चेअरमन व संचालकाच्या बेकायदेशीर आर्थिक व्यवहारामुळे चेअरमन विलास आंबेकर व सहाय्यक निबंधक सहकारी संस्था राहुल देशमुख यांनी संगनमताने भ्रष्टाचार करून ठेवीदारांना, सभासदांना वार्‍यावर सोडून दिनांक 14 नोव्हेंबर रोजी अवसायानात निघाल्याचे आदेश पारित केलेले आहेत. त्यामुळे अशा सहाय्यक निबंधकांना निलंबित करावे. अन्यथा तीव्र आंदोलन छेडण्यात येईल, असा इशारा माजी उपनगराध्यक्ष शंकर माळवदे यांनी दिला आहे.

याबाबत प्रसिद्ध केलेल्या पत्रकात नमूद आहे की, कायद्याप्रमाणे संस्था अवसयानात काढण्यापूर्वी सभासद, ठेवीदार, कर्जदार यांना नोटीस पाठवून त्यांचे म्हणणे ऐकल्याशिवाय आदेश काढता येत नाहीत. परंतु, सहाय्यक निबंधक व विलास आंबेकर यांनी स्वतःच्या फायद्यासाठी कोणत्याही सभासदाला नोटीस न पाठवता आदेश पारित केलेले आहेत. आदेशाची तारीख 14 नोव्हेंबर 2024 आहे व सभासदांना सुनावणीची तारीख 10 नोव्हेंबर 2024 ठेवलेली आहे. म्हणजेच आदेश काढण्यापूर्वी सुनावणीची तारीख यालाच उलटी गंगा म्हणतात. अशा गोष्टी घडण्याचे कारण म्हणजे मनात दुष्ट हेतूने व साठेलोटे करून घेतल्याशिवाय घडत नाहीत. मी दोन वर्षापासून सहाय्यक निबंधक यांच्याकडे सदरची संस्था बेकायदेशीर रित्या चेअरमन यांनी बंद केलेली आहे, असे लेखी कळवून देखील त्यांनी मला स्थळ पंचनामा करून संस्था चालू असल्याचे कळविले होते. मग अचानक असं काय घडलं की संस्था बंद असल्यामुळे अवसयकाची नेमणूक करण्याचे आदेश पारित झालेत. या सर्व गोष्टी संशयास्पद असून किंवा भ्रष्टाचार झाल्याशिवाय घडलेल्या नाहीत. म्हणून माझी वरिष्ठांना मागणी आहे त्यांनी त्वरित सहाय्यक निबंधक सहकारी संस्था राहुल देशमुख यांची खातेनिहाय चौकशी करावी व चौकशी होईपर्यंत त्यांना निलंबित करण्यात यावे. अन्यथा अशाच प्रकारचे गैरव्यवहार बेकायदेशीर आदेश इतर संस्थांबाबत होऊ शकतात याची प्रशासनाने काळजी घ्यावी.