सातारा : जिल्हा शासकीय रुग्णालयातील अर्भक मृत्यूप्रकरणी स्त्रीरोग तज्ज्ञ डॉ. चांदसाहेब शिकलगार यांच्याविरुद्ध सातारा शहर पोलीस ठाण्यात गुन्हा दाखल करण्यात आला आहे. उपसंचालक डॉ. भगवान अंतु पवार यांनी दिलेल्या फिर्यादीवरून भारतीय न्याय संहिता (बी.एन.एस.) कलम ९१, १०५ व १०६(१) अंतर्गत ही कारवाई करण्यात आली आहे. या घटनेमुळे जिल्ह्यातील आरोग्य व्यवस्थेवर गंभीर प्रश्नचिन्ह निर्माण झाले आहे.

दि. १६ मार्च रोजी सातारा येथील सिव्हिल हॉस्पिटलमध्ये घडलेली ही घटना अत्यंत संवेदनशील मानली जात आहे. एका १६ वर्षीय अल्पवयीन मुलीवर गर्भपाताची वैद्यकीय प्रक्रिया सुरू असताना, जिवंत अर्भकाचा जन्म झाल्याची माहिती समोर आली होती. या परिस्थितीत नवजात बाळाला तातडीने विशेष उपचार देणे आवश्यक असताना, त्यात कथित हलगर्जीपणा झाल्याचा आरोप मुलीच्या नातेवाईकांनी केला आहे.

नातेवाईकांच्या म्हणण्यानुसार, संबंधित अर्भकाला नवजात शिशु विभागात दाखल करण्यात विलंब झाला तसेच आवश्यक उपचार, देखरेख आणि वैद्यकीय नोंदींची पूर्तता योग्य प्रकारे करण्यात आली नाही. परिणामी, उपचाराअभावी बाळाचा मृत्यू झाल्याचा गंभीर आरोप करण्यात आला आहे. या प्रकरणी संतप्त नातेवाईकांनी उच्च न्यायालयातही रुग्णालय प्रशासनाविरोधात याचिका दाखल केली होती.

दरम्यान, प्राथमिक चौकशीत स्त्रीरोग तज्ज्ञ डॉ. शिकलगार यांनी स्वतः आवश्यक वैद्यकीय उपचार न करता तसेच त्यांच्या अधिनस्त डॉक्टर आणि नर्सिंग कर्मचाऱ्यांना योग्य सूचना न दिल्याचे समोर आले असल्याचा दावा सरकारी फिर्यादीत करण्यात आला आहे. या निष्काळजीपणामुळेच अर्भकाच्या मृत्यूस कारणीभूत परिस्थिती निर्माण झाल्याचा आरोप आहे.

या गंभीर प्रकाराची दखल घेत प्रशासनाने संबंधित डॉक्टरांना तत्काळ निलंबित केले आहे. तसेच, प्रकरणाची सखोल चौकशी सुरू असून, दोषींवर कठोर कारवाई करण्यात येणार असल्याचे संकेत अधिकाऱ्यांनी दिले आहेत. या घटनेमुळे शासकीय रुग्णालयांतील वैद्यकीय सेवा, जबाबदारी आणि नैतिकतेविषयी पुन्हा एकदा प्रश्न उपस्थित झाले आहेत. विशेषतः अल्पवयीन रुग्णांशी संबंधित प्रकरणांमध्ये अधिक दक्षता आणि संवेदनशीलता बाळगण्याची गरज अधोरेखित होत आहे.

पोलीसांकडून पुढील तपास सुरू असून, संबंधित वैद्यकीय कर्मचारी, नर्सिंग स्टाफ तसेच प्रशासनातील अधिकाऱ्यांची चौकशी करण्यात येणार आहे. या प्रकरणाचा तपास अहवाल समोर आल्यानंतरच संपूर्ण घटनाक्रम स्पष्ट होण्याची शक्यता व्यक्त करण्यात येत आहे.