मुंबई : सीसीएमपी प्रमाणपत्रधारक BHMS डॉक्टरांना महाराष्ट्र मेडिकल कौन्सिल (MMC) मध्ये नोंदणी देण्याच्या प्रस्तावाविरोधात आज (४ ऑगस्ट) राज्यभरातील डॉक्टरांनी संप केला आहे. २४ तासांच्या वैद्यकीय सेवा बंद आंदोलनाला सुरुवात केली असून या आंदोलनात राज्यभरातील सुमारे ५० हजार डॉक्टर, तर मुंबईतील सुमारे ६ हजार डॉक्टर सहभागी झाले आहेत. त्यामुळे आज खासगी रुग्णालयांतील नियमित ओपीडी सेवा विस्कळीत होण्याची शक्यता आहेत. अनेक रुग्णांना उपचाराविना परत जावे लागू शकते.

आज सकाळी ६ वाजल्यापासून सुरू झालेला हा संप उद्या (५ ऑगस्ट) सकाळी ६ वाजेपर्यंत सुरू राहणार आहे. मात्र, शासनाने MMC नोंदणीचा प्रस्ताव लागू केल्यास हे आंदोलन बेमुदत करण्याचा इशारा डॉक्टर संघटनांनी दिला आहे.

रुग्ण सुरक्षा, वैज्ञानिक वैद्यकीय उपचारपद्धती आणि आधुनिक वैद्यकाची गुणवत्ता अबाधित ठेवण्यासाठी हे आंदोलन असल्याचा दावा डॉक्टर संघटनांनी केला आहे. हा लढा कोणत्याही वैद्यकीय शाखेविरोधात नसून रुग्णहितासाठी असल्याचेही त्यांनी स्पष्ट केले आहे.

इंडियन मेडिकल असोसिएशन (IMA) महाराष्ट्र, महाराष्ट्र असोसिएशन ऑफ रेसिडेंट डॉक्टर्स (MARD), असोसिएशन ऑफ स्टेट मेडिकल इंटर्न्स (ASMI) तसेच इतर वैद्यकीय संघटनांनी या आंदोलनाला पाठिंबा दिला आहे.

दरम्यान, या आंदोलनामुळे राज्यातील शासकीय वैद्यकीय महाविद्यालये आणि संलग्न रुग्णालयांतील नियमित ओपीडी सेवा व इतर काही आरोग्यसेवांवर परिणाम होणार आहे. मात्र, अत्यावश्यक व आपत्कालीन सेवा पूर्ववत सुरू राहतील, अशी माहिती आयएमए महाराष्ट्रचे खजिनदार डॉ. अनंत गीते यांनी दिली.