सातारा : जागतिक पर्यटन दिनानिमित्त पर्वत तर्फ वाघावळे येथील मल्लिकार्जून विद्यालयामध्ये आयोजित करण्यात आलेल्या चित्रकला स्पर्धेमध्ये चिमुकल्यांनी कुंचल्याच्या माध्यमातून निसर्गचित्र रेखाटून आपल्या कलेचे दर्शन घडवले.
महाबळेश्‍वर तालुक्यातील अती दुर्गम भागात असलेल्या कांदाटी खोर्‍यातील पर्वत तर्फ वाघावळे येथील श्री मल्लिकार्जून विद्यालयामध्ये दि. 27 रोजी जागतिक पर्यटन दिनानिमित्ताने कांदाटी खोरे प्रकल्प कक्षातर्फे चित्रकला स्पर्धेचे आयोजन करण्यात आले होते. या स्पर्धेमध्ये विद्यालयातील अनेक विद्यार्थ्यांनी सहभाग घेवून आपल्या कुंचल्यातून निसर्गाचे विविध अविष्कार साकारुन शिक्षकांसह कांदाटी खोरे प्रकल्प व्यवस्थापन कक्षातील अधिकार्‍यांनाही अचंबित केले.
कांदाटी खोर्‍यातील कांदाट, सालोशी, सातावीन पेढा, उचाट, वाघावळे, लामज, निवळी अशा दुर्गम भागातील मुलांमध्ये मोठी प्रतिभा पहायला मिळत असल्याने भविष्यामध्ये हीच मुले कलेच्या माध्यमातून शाळेचे आणि आपल्या भागाचे नाव निश्‍चितपणाने उज्ज्वल करतील, असे उद्गार श्री मल्लिकार्जून विद्यालयाचे मुख्याध्यापक निकम यांनी काढले.
जागतिक पर्यटन दिन निमित्ताने पर्यटनसंबंधी विषयांवर विविध चित्रे रेखाटून विद्यार्थ्यांनीही आपल्या कलेचा मनमुराद आनंद लुटला. ही स्पर्धा यशस्वी करण्यासाठी श्री मल्लिकार्जून विद्यालयाच्या शिक्षक वृदांनी विद्यार्थ्यांना मोलाचे मार्गदर्शन केले.
या स्पर्धेवेळी उचाट च्या उपसरपंच मधुरा मोरे यांनी उपस्थित राहून विद्यार्थ्यांसह शिक्षक वृदांचेही कौतुक केले.