फलटण, दि. १२ :  फलटण तालुक्यातील निरगुडी येथील प्राथमिक शिक्षक सचिन काकडे यांच्या मृत्यूमुळे संपूर्ण शिक्षक वर्तुळात हळहळ व्यक्त होत आहे. त्यांचा मृत्यू हृदयविकाराच्या झटक्याने झाला असला तरी, जिल्हा परिषदेच्या प्रशासकीय कारवायांच्या धास्तीने व त्यामुळे आलेल्या मानसिक दडपणातूनच हा प्रकार घडल्याची चर्चा सामाजिक माध्यमांपासून शिक्षकांमध्ये जोर धरू लागली आहे.

या पार्श्वभूमीवर अमर साबळे यांनी जिल्हा परिषद प्रशासनावर तीव्र शब्दांत टीका केली. ते म्हणाले, “ऑनलाइन बदली प्रक्रियेत पारदर्शकता आणण्याऐवजी, दिव्यांग प्रमाणपत्रांची फेरतपासणी करून शिक्षकांचा अमानुष छळ केला जात आहे. सचिन काकडे यांच्याकडे अपघातामुळे आलेले ४१ टक्के दिव्यांगत्वाचे वैध प्रमाणपत्र असतानाही, केवळ २०२४ चे नियम लावून ते २९ टक्क्यांवर आणण्यात आले. हा अन्यायकारक प्रकार असून, प्रशासन शिक्षकांवर अन्याय करत आहे.”

साबळे यांनी पुढे गंभीर आरोप करताना सांगितले की, “शिक्षकांना निलंबन व पोलीस कारवाईच्या धमक्या देऊन त्यांच्याकडून पैसे उकळले जात आहेत. कराड येथील हॉटेलमध्ये बसून ‘अपात्र दिव्यांग’ यादीतून नाव वगळण्यासाठी पैशांची मागणी केली जाते. हा प्रकार म्हणजे सरळ सरळ ‘मुगलशाही’ असून, आम्ही हे खपवून घेणार नाही.”

साबळे यांनी प्रशासनाला आव्हान देत म्हटले की, “जर दिव्यांग प्रमाणपत्रे बनावट असल्याचा दावा केला जात असेल, तर ही प्रमाणपत्रे देणाऱ्या वैद्यकीय मंडळांवरच कारवाई व्हायला हवी. अनेक शिक्षकांनी या प्रकरणी न्यायालयात दाद मागितली आहे, त्यामुळे तरी त्यांच्यावर कारवाई करणे हा न्यायालयाचा अवमान आहे. शिवाय, विशिष्ट जातीच्या शिक्षकांना जाणीवपूर्वक लक्ष्य केले जात आहे. हा प्रकार न थांबल्यास, संबंधित अधिकाऱ्यांवर अॅट्रॉसिटी अंतर्गत गुन्हे दाखल केले जातील.”

शेवटी त्यांनी प्रशासनाला इशारा देत सांगितले की, “जिल्हा परिषद प्रशासनाने आपला मनमानी कारभार थांबवावा, शिक्षकांचा छळ त्वरित थांबवावा आणि सचिन काकडे यांच्या मृत्यूला जबाबदार असणाऱ्यांवर कठोर कारवाई करावी.”