सातारा : सातारा शहरामध्ये दोन ठिकाणी घरफोडी करून तो मुद्देमाल विकण्याच्या प्रयत्नात असणार्‍या सराईताला सातारा शहर पोलिसांनी सिव्हिल हॉस्पिटल परिसरात पेट्रोलिंग दरम्यान ताब्यात घेतले. त्याच्याकडून दोन लाख तीस हजार रुपयांचा मुद्देमाल हस्तगत करण्यात आला आहे. सातारा शहर पोलिसांच्या गुन्हे प्रकटीकरण शाखेने ही कारवाई केली आहे.

महेश शिवाजी बाबर वय 48, रा. किकली, ता. वाई, जि. सातारा असे आरोपीचे नाव आहे.

बाबर याने सातारा शहरात विलासपूर परिसरात ऍग्रोवन ऍग्रो मशीनरी ऑफिसच्या गाळ्याचे कुलूप तोडून लॅपटॉप, आयफोन, पॉवर बँक, तसेच शाहूपुरी हद्दीतील एक बंद बंगल्याचे कुलूप तोडून चार चाकी वाहनाची चावी असे साहित्य चोरले होते. हे साहित्य तो विकण्यासाठी क्रांतिसिंह नाना पाटील जिल्हा रुग्णालयाच्या परिसरात येणार असल्याची माहिती सातारा शहर पोलिसांना मिळाली. पोलीस ठाण्याचे पोलीस निरीक्षक राजेंद्र मस्के यांनी गुन्हे प्रकटीकरण शाखेला याबाबत तपास करण्याच्या सूचना दिल्या. या पथकाने सिव्हिल हॉस्पिटल परिसरात सापळा रचून महेश बाबर याला ताब्यात घेतले. त्याच्याकडे कसून चौकशी केली असता त्याने कृष्णा नगर व एमआयडीसी सातारा येथून दोन मोटरसायकल चोरी केल्याचे कबूल केले. या कारवाईत सर्व मुद्देमाल हस्तगत करण्यात आला आहे.