सातारा : ठोसेघर येथे अवॉर्ड संस्था, सातारा आणि संयुक्त वनव्यवस्थापन समिती ठोसेघर यांच्यावतीने रानभाजी महोत्सवाचे आयोजन करण्यात आल्याची माहिती ठोसेघर संयुक्त वनव्यवस्थापन समितीचे व्यवस्थापक प्रवीण चव्हाण यांनी दिली आहे.
श्रावण महिना व पावसाळ्यात शारीरिक आरोग्यासाठी रानभाज्यांचे सेवन हे लाभदायक असल्याचे वैद्यकीय शास्त्रातून सांगितले जाते. ठोसेघर धबधबा परिसरात पावसाळी पर्यटनासाठी येणार्‍या पर्यटकांना रानभाज्यांचे आपल्या आरोग्यामध्ये असलेले स्थान, रानभाज्यांबाबत मोलाची माहिती मिळण्याबरोबरच त्याचा आस्वादही या महोत्सवाच्या माध्यमातून घेण्यात येणार आहे.
अवॉर्ड संस्था, सातारा आणि संयुक्त वनव्यवस्थापन समिती ठोसेघर यांच्या वतीने ठोसेघर धबधबा परिसरात रानभाजी महोत्सव व रानभाजी रेसिपी यांचे रविवार दिनांक 15 सप्टेंबर रोजी सकाळी 10 ते सायंकाळी 6 वाजेपर्यंत आयोजन करण्यात आले आहे.  या महोत्सवात पर्यटकांना नाचणी, बाजरी, तांदूळ, वरी यांच्या भाकरी व भारंगी, भालंगा, कुर्डू, मोरशेंडा, चाईचा मोहर, आळंबी, अळूवडी, केळफुळाची भाजी अश्या विविध रानभाज्यांचा आस्वाद घेता येणार आहे. तरी पर्यटकांनी या महोत्सवास भेट देऊन रानभाज्यांचा अस्वाद घ्यावा, असे आवाहन संयोजकांच्या वतीने करण्यात आले आहे.