सातारा : कष्टकरी चळवळ क्षीण होत असतानाच श्रमिक मुक्ती दलाचे डॉ. भारत पाटणकर हे धरण, दुष्काळग्रस्तांसाठी लढा देत आहेत. 50 वर्षांपासून त्यांचे काम सुरू असून ही एक उद्भत घटना आहे. अशा लढावू नेतृत्वाचा अमृतमहोत्सवानिमित्त 4 सप्टेंबरला कोल्हापुरात कार्यगौरव सन्मान होणार आहे. यासाठी महाराष्ट्रातून लोक येणार आहेत, अशी माहिती डॉ. भारत पाटणकर अमृतमहोत्सवी कार्यगौरव समितीचे अध्यक्ष ऍड. कृष्णा पाटील यांनी दिली.
सातारा येथे शिवाजी विद्यापीठ शिक्षक संघ (सुटा) कार्यालयात आयोजित पत्रकार परिषदेत ऍड. पाटील बोलत होते. यावेळी समितीचे कार्याध्यक्ष कॉ. संपत देसाई, सचिव सुधीर नलवडे, विजय मांडके यांच्यासह अन्य पदाधिकारी आणि सदस्य उपस्थित होते.
कॉ. देसाई म्हणाले, श्रमिक मुक्ती दलाची स्थापना 1982 ला झाली. डॉ. भारत पाटणकर यांनी 50 वर्षांपासून महाराष्ट्रातील धरणग्रस्त, दुष्काळग्रस्तांसाठी लढे उभे करुन यशस्वीही केले. याचबरोबर त्यांचा सांस्कृतिक चळवळीतही सहभाग राहिला. विद्रोही सांस्कृतिक चळवळीतील त्यांचे योगदानही मोठे आहे. महाराष्ट्रातील सामाजिक, सांस्कृतिक चळवळीचा अभ्यास करताना डॉ. पाटणकर यांना डावलता येणार आहे. असे व्यक्तीमत्व असणार्‍या डॉ. पाटणकर यांचा अमृतमहोत्सवानिमित्त 4 सप्टेंबरला सकाळी साडे दहा वाजता कोल्हापुरातील शाहू स्मारक भवनमध्ये कार्यगौरव सन्मान होणार आहे.
कोल्हापुरातील हा सन्मान राष्ट्रवादी कॉंग्रेसचे अध्यक्ष शरद पवार यांच्या हस्ते होणार आहे. कार्यक्रमाला खासदार छत्रपती शाहू महाराज, खासदार विशाल पाटील, आमदार सतेज पाटील हे उपस्थित राहणार आहेत. तर डॉ. गोपाळ गुरू, मनिषा गुप्ते, वाहरू सोनावणे आणि डॉ. जयसिंगराव पवार हे प्रमुख वक्ते असणार आहेत. या कार्यक्रमात सातारा जिल्ह्यातूनही मोठ्या संख्येने धरण आणि दुष्काळग्रस्त सहभागी होणार आहेत, अशी माहितीही कॉ. देसाई यांनी पत्रकार परिषदेत दिली.

डॉ. पाटणकर यांच्यावर संदर्भग्रंथ...
पत्रकार परिषदेत मान्यवरांनी डॉ. भारत पाटणकर यांच्या कार्याचा गौरव केला. तसेच वर्षभर महाराष्ट्रात विविध उपक्रम राबविण्यात येणार आहेत. तर आगामी काळात डॉ. पाटणकर यांच्यावर संदर्भग्रंथ तयार करण्यात येणार आहे. यामध्ये तीन भाग असणार आहेत. श्रमिक’चा आढावा, देशातील सामाजिक-आर्‍थिक चळवळ आणि डॉ. पाटणकर यांचा परिवार व त्यांच्या कार्याचा आढावा यामध्ये असणार आहे. त्याचबरोबर डॉ. पाटणकर यांच्या कार्यावर एक फिल्मही बनविण्याचा विचार आहे, असेही या पत्रकार परिषदेत स्पष्ट करण्यात आले.