सातारा  :  सातारा जिल्ह्यातील जिल्हा परिषद व ११ पंचायत समिती सार्वत्रिक निवडणूक २०२६ सुधारित निवडणूक कार्यक्रमानुसार निवडणुकीचे मतदान शनिवार दि. ७ फेब्रुवारी रोजी होणार आहे. मतदान केंद्रावर मतदान कर्तव्य बजावणीकरीता मतदान पथकांची नियुक्ती केलेली असून त्यामध्ये सातारा जिल्ह्यातील माध्यमिक व प्राथमिक शाळांमधील मुख्याध्यापक, पर्यवेक्षक, शिक्षक व शिक्षकेतर कर्मचाऱ्यांची नियुक्ती करण्यात आलेली आहे.

मतदान कर्तव्याकरीता नियुक्त केलेले मतदान पथक यांना शुक्रवार दि.६ फेब्रुवारी रोजी सकाळी ९ वाजल्यापासून संबंधित तालुका स्तरावरुन मतदान साहित्य वाटप करण्यात येणार आहे.  सदर साहित्य घेवून मतदान पथक हे त्यांना नेमून दिलेल्या मतदान केंद्रांवर दिनांक ६ फेब्रुवारी रोजी सकाळी ११.३० वाजलेपासून पोहोचण्यास सुरुवात होणार आहे.  त्यामुळे ज्या प्राथमिक व माध्यमिक शाळेमधील कार्यरत सर्व शिक्षक व शिक्षकेतर कर्मचारी यांची जिल्हा परिषद व पंचायत समिती निवडणुक कामाकरिता नियुक्ती केली आहे, अशा शाळांना शुक्रवार, दि. ६ फेब्रुवारी रोजी सुट्टी जाहिर करण्यात आली आहे. तसेच ज्या शाळेतील सर्व शिक्षकांची जिल्हा परिषद व पंचायत समिती निवडणुक कामाकरिता नियुक्ती केलेली नाही, त्या शाळा शुक्रवार दिनांक ६ फेब्रुवारी रोजी सकाळी ७.३० ते ११.३० या वेळेत भरविण्याचे निर्देश सातारा जिल्हा निवडणूक अधिकारी तथा जिल्हाधिकारी संतोष पाटील यांनी दिले आहेत.

तसेच दिनांक ७ फेब्रुवारी रोजी सकाळी ७.३० वाजल्यापासून सर्व मतदान केंद्रांवर मतदान प्रक्रिया सुरु होणार असल्यामुळे तसेच उद्योग, उर्जा कामगार व खनिकर्म विभाग यांच्याकडील दिनांक ३० जानेवारीच्या परिपत्रकानुसार शनिवार दिनांक ७ फेब्रुवारी रोजी सुट्टी जाहिर करण्यात आली आहे.