सातारा : रक्षाबंधनाच्या निमित्ताने सातारा नगरपालिकेतील भाजपच्या नगरसेविकांनी नगराध्यक्ष अमोल मोहिते यांना राखी बांधत शुभेच्छा दिल्या. नगराध्यक्षांच्या दालनात झालेल्या या उपक्रमातून स्नेहभावासोबतच भाजपच्या नगरसेविका आणि नगराध्यक्ष यांच्यातील समन्वयाचे दर्शन घडले.

ज्येष्ठ नगरसेविका सुजाता राजेमहाडिक, सिद्धी पवार यांच्यासह भाजपच्या नगरसेविका यावेळी उपस्थित होत्या. नगरसेविकांनी नगराध्यक्षांना राखी बांधून रक्षाबंधनाच्या शुभेच्छा दिल्या. नगराध्यक्ष अमोल मोहिते यांनी सर्व नगरसेविकांचे आभार मानत त्यांना शुभेच्छा दिल्या.

दरम्यान, सातारा पालिकेतील सत्ताधारी भाजपच्या राजकारणाच्या पार्श्‍वभूमीवर या उपक्रमाकडे राजकीय दृष्टिकोनातूनही पाहिले जात आहे. नगरसेविकांचे एकत्रितपणे नगराध्यक्षांच्या दालनात उपस्थित राहणे आणि राखी बांधणे, यातून पक्षातील परस्पर समन्वयाचा संदेश देण्यात आल्याची चर्चा पालिका वर्तुळात आहे.

शहराच्या विकासासाठी नगरसेवक-नगरसेविकांनी एकत्रितपणे काम करण्याची भूमिका नगराध्यक्ष मोहिते यांनी व्यक्त केली. त्यामुळे रक्षाबंधनाचा हा उपक्रम स्नेहबंधासोबतच पालिकेतील भाजपची संघटनात्मक बांधिलकी अधोरेखित करणारा ठरला.