सातारा : सातारा शहरातील ज्येष्ठ नागरिक गणेश उत्सवात वापरल्या जाणार्‍या डॉल्बीच्या विरोधात आक्रमक झाले आहेत. समर्थ ज्येष्ठ नागरिक संस्था तसेच शहरातील इतर काही ज्येष्ठ नागरिक संघाने एकत्र येऊन जिल्हा प्रशासनाने डॉल्बीला मर्यादित राहून जरी परवानगी दिली तरी त्याचा निषेध करायचे धोरण निश्चित केले आहे. डॉल्बी नकोच, या मागणीवर ज्येष्ठ नागरिक संघटना ठाम आहे. 

समर्थ परिसर ज्येष्ठ नागरिक संस्थेचे अध्यक्ष विजय देशपांडे यांच्या नेतृत्वाखाली ज्येष्ठ नागरिकांच्या शिष्टमंडळाने जिल्हा प्रशासनाचे निवासी उपजिल्हाधिकारी नागेश पाटील यांना निवेदन सादर केले आहे. या निवेदनात नमूद आहे की, गणेशोत्सवांमध्ये डॉल्बीचा अमर्याद वापर केला जातो. शाहू कला मंदिर मध्ये समन्वय समितीची बैठक झाली. या बैठकीत डॉल्बीचा आवाज पूर्णपणे बंद करण्याचे आदेश देण्यात आले नाहीत. काही ग्रामपंचायतींनी स्वयंस्फूर्ततेने निर्णय घेतले आहेत. मात्र सातारा शहरात डॉल्बी वाजवणे आणि त्याच्यावर आवाजाची मर्यादा घालणे, असा जिल्हा प्रशासनाने सूर पकडला आहे. हल्ली वाढदिवस अथवा अन्य कारणांनी सातारा शहरात मोठ्या आवाजात फटाकडे वाजवले जातात. लाऊड स्पीकरवर मोठ्या आवाजात गाणी लावली जातात. यामुळे शांततेला तडा जातो. कानठळ्या बसून ज्येष्ठ नागरिकांच्या प्रकृती बिघडतात. अशा आवाज निर्मितीला शासनाने कठोरपणे पायबंद घालावा. 

जिल्हाधिकारी संतोष पाटील व पोलीस अधीक्षक तुषार जोशी यांनी याबाबत ठोस निर्णय घ्यावा, अशी मागणी निवेदनात करण्यात आली आहे. याबाबत जिल्हा प्रशासनाने योग्य निर्णय घेतला नाही तर या निर्णयाच्या विरोधात ज्येष्ठ नागरिक यांच्यावतीने सातारा शहरातून निषेध रॅली काढण्यात येईल, असा इशारा देण्यात आला आहे.